40 eqrotho hrene du cameydan mahzamlın me Zaxo

Hol 40 eqrotho du camaydan du garbyo du Iraq, jbiri dmaxlın a botathe wa qıryawothathe, mcal fothe da hjome uda taxtuşe dkımdawmi beyn da hayle kaboşe d’Turkiya udu gerilla di PKK.

 I mawdconuthathe hiwole Faros Yuxanna, dkıtyo bu Mawtbo qlimoyo d’Nuhadra. Mawdıc dan 40 yaqrothani, mahzamlın lğer qıryawotho di hiğmonutho.

Kul dkothe, kımazıd u gayso Turkoyo a haylawothayde bu garbyo du Iraq u kmaqşe a cuqobayde calu qlimano da turone, bnişo dmohe dharbo lu gerilla di PKK. U qrobano, hawi celtho dba mowat dıbnaynoşo dmahzımi ma dukothani dkıtne cala thume dbeyn Turkiya udu garbyo du Iraq.

U hadomo du Mawtbo di hiğmonutho d’Nuhadra Faros Yuxanna makadle, dhol 40 yaqrotho mu camaydan mahzamlın mi hiğmonutho.Yuxanna mırle; 40 yaqrotho du camaydan, mahzamlın ma qıryawothathe mcal fothe da taxtuşani dkımdawmi beyn Turkiya udu gerilla di PKK bu qlimo d’Kurdistan. Dilonoyith ba zabne haroyani, mazıdla Turkiya a cuqobayda qariwo l’Zaxo u Amadiya.

Lfuth Yuxanna, an 40 yaqrothani du camaydan dkıtne ma qıryawotho d’Zaxo, kıkurxi cal duktho du fyoşo bi mditho d’Zaxo, Birsive, Batifa u Hizawa. Yuxanna sımle qroyto l’Turkiya uli PKK, dmawfıqi u qrobano ma thume u mırle; Turkiya wa Kurdoye trodımdawmi a taxtuşathe larwal da thumaydan, cal du cnufyano, kıxolıq zuctho hreto beyn du camaydan.

Mu şuroyo da cuqobani dmabdele u gayso Turkoyo bu qlimo d’Kurdistan, qtil hol 7 mdinoye u mınyono hreno mjarhi yaquro. U qrobano hawiste celtho, dmitaxlın ba casrowat d’qıryawotho dıhzelın anarcotho wa mulkone da mdinoye husrono rabo.