7 konvoye folhoye Turkoye şafici l’İdlıb

Ataxtuşe wa hjome bayn da haylawotho du rejim d’Suriya wa jatawiye dıkmısnodi m’Turkiya, b’qaşyutho heş kımdawmi bag bine mşahılfe du qrobo bifnitho d’İdlıb.

 Bebzabno, u gayso kaboşo dı Turkiya dkımdawım dmaqwe u haylayde b’İdlıb, mşadarle şawco grube u konvoye hathe li fnitho.

Imşatasto d’Suriya da zedqe noşoye, mawdacla da haylawotho du rejim naqla hreto sımlın adyawma hjome di naşfe cala grube mzayne dıkmısnodi m’Tırkiya bu tayımno d’İdlıb. Bayn da fenyotho dsimi ahjomani aclaye kito Alfatira, Kansafra, Flefıl u Benin.

Lfuth i mşatasto d’Suriya, agbine du xtuto du qrobo bu turo d’Alzawiya hawun wahdo lıhjome mşahılfe b’zayne yaqure u xayife bayn da haylawotho du rejim d’Suriya wa jatawiye dıkmısnodi me Anqara, elo lıfris mawdconutho cal husrone di nafşo.

Camgabıdathe, u gayso kaboşo dı Turkiya bu zabno da 24 şoce dşaficina mşadarle zıd me şawco grube u konvoye folhoye la nuqazyotho dkıtle bi fnitho d’İdlıb. Agrubani dımşadri kmişakliwo me 450 radoyotho folhoye, baynothaye radoyotho matcıne mcadrınwotho folhoye u lojistik.

Bu şıkılano Turkiya mu zabno dımşarewola i şalyuthzayno b’İdlıb bu yarho d’Othır dşaficina u hul ucdo, macbarla la narcotho d’Suriya 5825 radoyotho folhoye, uba olufe d’folhe Turkoye.

Mxasra hreto, i mşatasto d’Suriya da zedqe noşoye bi mawdconutho dıfrısla athmıl mathkarla da jatawiye dıkmısnodi me Turkiya mıdlın nişo elaye tloth tayisyotho Rusoye dılo pilot qariwo mu thumo bayn d’Suriya u Liwaa Aliskandaron, u bi netije atloth tayisyothani madrın bıtloth fenyotho mşahılfe hedor d’İdlıb.