A neşe krıhlın bı tagliyotho unfoqo dı Turkiya mu qyomo d’Stanbul

Ban alfayo d’neşe, mıştawtaflın li taglitho dımtaybo athmıl bi mdito d’Stanbul d’Turkiya. A mtagliyone krıhlın u fusqono du rişqutno Turkoyo, cal dgrışle u athro mu qyomo dımbayanwo mqabıl du cnufyo dıkmisım cala neşe.

Bi taglithathe macle pankarte dkıtwo kthiwo aclaye; U qatlo da neşe-sbutho folitiqoyto’yo wa mtagliyone mazcaqe’ste slogane u tlıblın, dmisım u sutoro da neşe ulo da farsufe dıksaymi u hawbo.

Mu zabno du rişqutno Recep Tayyıb Erdoğan grışwole Turkiya meqım şabtho mu qyomo d’Stanbul dıkmidıc bu ışmo; U konvenşın d’Stanbul, dımtayabwo camu Mawtbo d’Urifi, kımdawmi a hfuxye da neşe, d’tukose Emwothoye u rişono d’athrawotho frişe dbritho. U konvenşın mqadamwo ba 2011 u şafıcwo la haye ba 2014 u mdewo’ste me 45 athrawotho frişe.

U konvenşın kıtwole dilonoyto u ulsoyutho rabtho, cal dkıtwe inaqla qamayto dıkmitayıb hawxa mede leşan u sutoro da neşe u dıkhobış bgawe mınyono celoyo d’qyome dkıtyo. Bu qyomano’ste mıtlabwo dmibayın qonuno bu nomuso esonoyo d’Turkiya dıknofıq mqabıl du cnufyo dıkmisım cala neşe. Bu nişo dkıtwo bu qyomano’ste mıtlabwo dmitaşe fulhone u dmitakle u cnufyo dıkmisım cala neşe ba botathe.

Athmılste naqla hreto, ban alfayo d’neşe kfixi la zabuqone leşan dmahwın u hfuxyathe mqabıl du fusqono du rişqutno. A neşe du gabo d’HDP’ste mtayablın tagliyotho bi sbuthathe. Hdo ma hadire di taglithathe d’Stanbul’ste mırla; Ahna lıgmaklena a tagliyothani u gıdfayşina harke ba zabuqe, hol dmitahwelan i hiruthaydan wu qyomaydan. Ankara heş lo mawdacla celtho, calu nfoqayde mu qyomano elo AKP komır’ste; U konvenşın kımancım u struktur di iqartho u kımşaçıc lu cnufyo.

U waziro dcali iqartho, cala fulhone ucala şwole kenşoye mırle; Ba qonune du athro, kibın u garanti da zedqe da neşe wu sistemaydan di kinutho, dynamik u qawyo’yo leşan dsoyım qonune hathe-en dothe dluzmi. Elo lfuth u Tukoso Emwothoyo du Hulmono, 38 ba mo da neşe b’Turkiya kmitafiti b’cnufyo ba botathe wu mınyonano b’Urifi kula, 25 ba mo’yo. Meqım şato, qtılwo 300 neşe b’Turkiya.