A tagliyotho b’Suriya kımdawmi mqabıl du timo du muklo

A tagliyotho du protesto mqabıl du timo celoyo du muklo, kımdawmi bi erişkoyto d’Suriya Darmsuq. I celtho dcalu timo da muklone, u kriz dhawi bu haqlo du momuno du athroyo.

 Mawdıc du timo da muklone ucdo bu zabno dıkmdawım uqrobo gawoyo d’Suriya, 16 naqlat cleytır me meqım 9 eşne’yo.

Bi arişkoyto d’Suriya Darımsuq, sxir mınyono celoyo dı dukane du muklo mcal fothe dnafıl ğalabe u timo di lira Suriye. U timo d’muklone asasi kmitacle kımo naqlat bıgawe dıha yawmo u calatheste, kul dkothe kızaydo i mıştawtıfonutho la tagliyothani dımşarelın bu athro mqabıl du tecliyo du timo da muklone b’Suriya.

U tukoso Emwothoyo dcali tahrazto du muklo makadle, dhol 9 milyone dıbnaynoşo b’Suriya, lıkuxli vitamine dkıtne ulsoye lu guşmo du barnoşo. Hani 9 eşne dıqrobo gawoyo d’Suriya, mahrawle u shıfle u momuno dı mdinotho frişe du athro. Wu qetro du virus d’Corona u kriz du athro şbobo Lebnonste, maqşele i aykanoyuthathe d’Suriya.

Bi şabtho dıbqamuthaynaste, kmıntır d’Amerika dmahto tedbire hathe calan athrawotho ucala şırak dkıtte esore camu rejim d’Suriya u calathe, kul yawmo dıkşofıc, kınohıt u timo da zuze du athro. Bu şuroyo di şatathe, mızwanwo ha dollar b’700 lirat Suriye, elo ucdo u timo d’dolar Amerikoyo b’3 alfo liratyo.

Bi şabtho haraytathe, sim tagliyotho bı mdinotho frişe d’Suriya ubı Suweida dkıtwe u camo meqım noqufo du rejim, ucdo kıtolıb du rişathro dmıstacfe mi wolithayde. Leşan al Asad dmakle a hfuxyani, mıdwole u rişwazire mi wolithayde u mahıtle hreno bıdukthe. Heş meqım mu virus d’Corona, hol 80 ba mo da bnaymothoye d’Suriya faqirewın.