A wazire di baroyutho du Iraq d’Mısır u d’Yurdnon laqın hıdode

A wazire di baroyutho du Iraq, d’Mısır u d’Yurdnon laqın hıdode bu zabno dıkmdawım u knuşyo du Mawtbo Gawonoyo d’Emwotho Mhaydotho b’New York.

Bi ytawtathe a tlotho bnayamne, kalın dilonoyith cali methcadronutho dbeynothaye bu dacith u aydarbo gıdqudri dmarkıwi mlahmonutho qwitho bu haqlo du momuno udi siyase beyn da tlotho athrawotho.

Bi ytawto dhawyo’wa meqım şabtho beyn du rişqutno du Iraq, d’Mısır udu malko d’Yurdnon drışwolın a mkone du tuyobo d’tarmıyotho mşawtıfe bu haqlo du momuno, du enerji udu kahrobo. U rişwazire du Iraq’ste hawiwole 27 bu yarho d’Hziron ytawto cama rişone d’Mısır u Yurdnon leşan u şuşoto da esore.

İ socurutho du rişqutno Mısroyo l’Boğdod, hawyo’wa bu şıkılano i qamayto bıthır 30 eşne. Ucdo’ste a wazire da 3 athrawothani hawilın ytawto bu zabno dıkmdawım u knuşyo du Mawtbo Gawonoyo d’Emwotho Mhaydotho b’New York.

U waziro Iraqoyo Fuad Hussein, u waziro d’Yurdnon Ayman Safadi wu waziro di baroyutho d’Mısır Sameh Şoukry drışlın i methcadronutho dbeynothaye bu dacith u aydarbo gıdqudri dmarkıwi mlahmonutho qwitho bu haqlo du momuno udi siyase beyn da tlotho athrawotho.

A 3 wazire matın’ste l’awyutho cali sniqutho dkito lu şuşoto da esore stratejikoye bhaqle frişe u dımnasın dımsafın a şwole wa qetrathe camhıdode. U waziro Yurdonoyo dmawdacle du athrayde kımdawım u snodayde lu terkiwo di mşaynutho udi şalyutho bu Iraq u gawonoyith bu qlimo kule, m’akadleste d’Yurdnon kısundo u bnoyo u hethotho du Iraq.