30/03/2021

A wazire di baroyutho du Iraq u d’Yurdnon u d’Mısır laqın hdode

Atlotho wazire di baroyutho du Iraq, d’Mısır ud’Yurdnon laqın hdode bi erişkoyto d’Boğdod.

Bi ytawtathe, a’tlotho wazire dıdrışlın i aykanoyutho harayto du madınho mescoyo, makadlınste i ulsoyutho dmitaqwın an’esore momunoye udi mşaynutho bayn da tlotho athrawotho.

Atlotho wazire di baroyutho du Iraq Fuad Husayn, d’Mısır Sameh Şukri ud’Yurdnon Ayman Alsafadi, bıthır mi ytawto dhawilın athmıl camıhdode bı Boğdod, qtırlın knuşyo lu tboco froso.

Alsafadi bu mamlo dsımle, makadle dıklozım u Iraq dmıfrış ma krize qlimoye dkito hedore, u mawdacle ste du athro d’Yurdnon ba mkone dkıtle kısonıd u Iraq u mırle “i mşaynutho du Iraq wi şalyuthayde ulsoyutho yo li mşaynutho du qlimo kule. Ahna kımtaybina dhowe knuşyo bayn da rişone da tlotho athrawotho, bnişo dmitaqwe u fulhono mşawtfo dbaynothayei wa fuqdone du knuşyo da tlotho rişone gıdhowın dawse lafu teqwiyo du fulhono Caraboyo mşawtfo”.

Mgabo hreno, u waziro Husayn mawdacle dıdrışle cama tre wazire d’Mısır ud’Yurdnon, i tarmitho du xtuto du nafto mi mditho d’Albasra bu Iraq huli mditho d’Alcaqaba b’Yurdnon, u grışleste u zuhoro cali methcadronutho du snoco dıkmıbce dmitaqwe bayn da tlotho athrawotho.

Mxasra hreto, u waziro Şukri mawdacle dkıtle ntarto du knuşyo bayn da rişone da tlotho athrawotho gıdmitayıb bı Boğdod cal qariwo, u maqrahle dkito awyutho bayn da hzayotho d’Mısır, du Iraq ud’Yurdnon.

Camgabıdathe, u malolo di wazirutho di baroyutho du Iraq Ahmad Alsahhaf bi maqırhonutho dhule lu tboco froso, mawdacle da tlotho athrawotho camgabıd da şuşote dkowın bu qlimo du madınho mescoyo drışlın ste sebwotho momunoye, qlimoye u emwothoye dıkmitahwelın yasifutho mşawtafto. Alsahhaf mırle ste “a’tlotho wazire drışlın i sbutho Fleştoyto, u kriz d’Suriya, u qrobo cali marıhbonutho, u kriz d’Libya wa şuşote haroye du kriz du Yeman”.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…