A Yezidoye matın l’awyutho cama haylawotho Iraqoye

Bi netije du mrodo dmahwelın acomure di fnitho d’Şigur, ahaylawotho Iraqoye lıqadiri athmıl dmaydi dukthıd da haylawotho da Asayış d’Yezidxan, u matın lawyutho cama comure dıdırşi i sbuthathe ba zabne dıbqamuthayna.

 Camgabıdathe, ba mdinotho mşahılfotho du qlimo di Gozarto d’Bethnahrin d’Suriya kımdawmi heş atagılyotho camonoye dıksındi a Yezidoye mqabıl du qyomo dımde bayn da tarte şultınwotho d’Boğdod u d’Arbil cali aykanoyutho d’Şigur.

 Athmıl ba şoce dfothıd safro laymiwo a comure di fnitho d’Şigur qum da qentrune da Asayış d’Yezidxan, xıd funoyo lu talab dhawiwola i mdabronutho yothoyto d’Şigur, bnişo dmınci ahaylawotho Iraqoye dmahti ido cala qentrune da Asayış d’Yezidxan udmawfıqi ahaylawotho Yezidoye menaye.

Bıthır mu knuşyo dhawi bayn da mathlone da haylawotho Iraqoye u taşdarto ma comure saqıbloye d’Şigur, mıte lawyutho da qentrune da Asayış d’Yezidxan dkıtne b’Xansur u b’Snune u bu qentrun di dmitho d’Şigur dfayşi bidothıd da Yezidoye. Bebzabno, mşawhır u droşo du taro qonunoyo da n’Asayış d’Yezidxan cama mathlone da haylawotho Iraqoye l’cedono hreno dheş lımbayın.

Bıthır mi maqırhonutho dhula i taşdarto da comure d’Şigur, amtagılyone şrelın u kunoşathe qum da qentrune da haylawotho d’Yezidxan, bıthır mdımşarıri a talabathe.

Camgabıdathe, acomure dıkhoyın ba mdinotho mşahılfotho du qlimo di Gozarto d’Bethnahrin b’Suriya, kımdawmi dmahwın u hfuxyathe mqabıl du qyomo dımde bayn di şultonutho du Iraq wu gabo demoqratoyo d’Kurdistan di KDP. Ba mowat d’mtagılyone layimi bu wahdo d’Azadi bi mditho dı Derik, u ba slogane dmazcaqlın mhanelın u mrodo d’Şigur. U bi qastra d’Çel Ağa mtayıb taglitho dmıştawtaflela ba casrowat d’farsufe dıkrıhlın i tahrazto bceldboboyto mqabıl da Yezidoye.

Adyawmaste, ba mowat d’comure di qastra di Dırbasiye u d’Zarkan bi taglitho mtayablın krıhlın ixyene dısımle u gabo di KDP bhaq du camo Yezidoyo d’Şigur.