Adyoma msale bi cito d’Ayasofia xıd masığdo

Meqım 97 ışne xıd adyawma, mahıtwo xıtmo du qşoco da Mşihoye dkıtne b’Turkiya bu qyomo d’Lozan dsımwo ba duroşe d’cama athrawotho macırboye.

 Adyawma naqla hreto b’Turkiya, u qum caynothe da Urifiye kmitahwe remzo du qşoco da Mşihoye dfayişi, bi slutho dsimo bi cito d’Ayasofia, dımşahılfo l’masığdo.

Bu yawmano bi şato dan 1923, bu qyomo dhawiwo b’Lozan huwo u fusqono di Qutnutho d’Turkiya dmişatso wa came şerşoye du athro xıdu xamo Suryoyo-Othuroyo wa came Mşihoye hrene, mnici ma zedqe umthoye dkıtwolın.

Adyawmaste b’Turkiya bu zawho u ba mamle dsımlın a rişone d’Turkiya bu yawmo dsimo islutho qamayto b’Ayasofia dımşahılfo l’masığdo, hulın remze dıkdomın l’meqım 97 eşne dkubci dmaqimi a came Mşihoye wu makthabzabno d’Turkiya. Bu zabno di slutho dsımlın adyawma bi cito d’Ayasofya, u waziro di tawditho kıtwo b’idothe u sayfo bgawe di cito mın kromız hano.

Yaste xıd mırle u tewoloğoyo İhsan Eliaçık; u rişono d’Dacış’ste inaqla dımsalewo madwo u sayfo b’idothe. Me gabo hreno bu Yawnan a othowiye bi ruşmoyutho manıhti lu falgo wa rişone tawdithoye mahwelın u hfuxyathe mqabıl du şuhlofo d’Ayasofia l’Masığdo.

Bi ytawto dhawile u rişahsayo d’Amerika Elpidoforos camu rişono Donald Trump wu tahlufayde Mike Pence mahwele u hfuxyeyde dlıkmqabıl du şuhlofo di cito l’masığdo. Bi maqırhonutho dhule rişhsayo mırle; Trump ktocın ğamo rabo cala Mşihoye d’Turkiya, u latyo thınihoyo mu fusqono dmıdle Erdoğan bi sbutho d’Ayasofia.

Lfuth u tbocofroso d’Turkiya dkıtyo şaryo, kito hfuxye qaşye mqabıl di sbuthathe d’Ayasofia xıd hın ma malole mırlın; Qay latwolan masığde makıfyone, sim u bınyonano u myaqrano masığdo yaste bu twitter dıflığle u qoyumo du gabo d’AKP d’Stanbul Şirin Unal bi sbutho d’Ayasofia u camo mşayele mın hawi me Kadirova i  claymtho dcımra 23 eşne dımqafyowa mahto bu baytayde.

Bıthır mu qyomo d’Lozan dımbayanwole u dactid d’Turkiya, hın ma mşale Urifoye mahwewolın hfuxyo dhlımi a came şerşoye d’Turkiya. Ucdoste bu yawmano d’Erdoğan wa rişone du athro kımaydi jasara mi klayto dkowelın a hayle Urifoye Mşihoye dıkfayşi mfarjone u naqlatste kımahwın a hfuxyathe bıthır mu mede dkowe b’rişe da Mşihoye.