13/04/2021

Ahfuxye mqabıl du fusqono du bethdino Turkoyo calu hkomo d’Dayroyo Aho Bilecen kımdawmi

A hfuxye mqabıl du fusqono dhule u bethdino d’Turkiya bhaq du thomo dkito calu rişdayro di dayro d’Mor Yahkub d’Qarno-dayroyo Aho Bilecen kımdawmo b’athrawotho mşahılfe.

Camgabe di kampanya da imdat dımabdelın a gabe u şutose du cameydan, wu Mawtbo du camo Suryoyo, mhadarle taklitho bi mdito d’Ausburg d’Almanya.

 İ kampanya da imdat dımabdyolın a gabe wa şutose du cameydan mşarela dmıfroso ba dafe du nawlo wu camo kımahwe ela lhiqutho dmahti ışmaye xıd hfuxyo mqabıl du fusqono du bethdino d’Turkiya dlo kinutho mqabıl du dayroyo Aho Bilecen di cito Suryoyto Orthoduksoyto dkıtyo u rişdayro di dayro d’Mor Yahkub d’Qarno.

Bcayni zabno şutoso hreno du cameydan mıştawtafle li kampanya da imdat dkıtyo u Huyodo Othuroyo d’Hollanda’ste kobıc d’sonıd i kampanyathe da imdat mqabıl du fusqono du bethdino d’Turkiya mqabıl du dayroyo Aho Bilecen. İ kampanyathe dmati u mınyono da imdat l’zıttır me 2500 farsufe hulu zabno dıkmtaybinawo a tebe.

Me gabo hreno u Mawtbo Suryoyo du Camo mtayabwole taklitho bi mdito d’Ausburg d’Almanya leşan gorış u zuhoro calu fusqono lo kino du bethdino d’Turkiya bhaq d’dayroyo. U malolo  du Mawtbo du camo Suryoyo Sami Griğo  qrele u buyono du Mawtbo d’Bethnahrin da Suryoye dkrıhle u qedmomo d’Turkiya lu dayroyo di cito Suryoyto Aho Bilecen.

Bi taklithathe dmıştawtaflela mınyono d’gabe du cameydan dıksundi u hfuxyo mqabıl du fusqono du bethdino dhiw mqabıl d’dayroyo Aho. Bu şıkılano a hfuxye mqabıl du qedomo d’Turkiya lu camo Suryoyo kımdawmi b’athrawotho mşahılfe.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…