Gıdmitayıb taglitho mştawtafto 24 bu yarho d’Nison b’Sidney d’Australya laşan u sayfo da 1915

An Armınoye, a Suryoye Othuroye wa Yawnoye dıkhoyın b’Australia, gıdmtaybi 24 bu yarhano d’Nison taglitho b’Sidney. Bi taglithatheste a mıştawtıfone gıdtulbi mu rişwazire u mi şultonutho du athro dmawdın bu qtolğenso dan 1915.

Bebzabno u senator di marcitho d’Kalifornia d’Amerika Anthony Portantino’ste sımle qroyto lu rişono Joe Biden, dmawde bu qtolğenso dan 1915.

Bu taro di kampanya dmabdewolın meqım zabno a tukose u şutose dan Armınoye, da Suryoye Othuroye uda Yawnoye b’Australia, leşan i mawdyonutho bu qtolğenso dsımwola i mamlaxtho da Cuthmanoye calan abohothathe bu zabno du qrobo qamoyo dbritho, ucdo mbayanlın siqumo leşan dmisım taglitho leşan u Sayfo.

İ kampanyathe dmabdewolın a 3 camani bu yarho d’Şbot da 2020, snidowa me 40 hadome du parlamento u tlıbwo mi şultonutho federaloyto dmawdyo bu qtolğenso dan 1915. Ucdo’ste mbayın u siqumo d’24 bu yarhano d’Nison, leşan u tuyobo d’taglitho bi mdito d’Sidney. U slogan di taglithathe’ste; Leşan i Kinutho, u kmıntır dmıştawtafla ban alfayo dıbnaynoşo.

A 3 camani sımlın qroyotho la kenşathe, dmıştawtıfi acmaye, bnişo dsaymi qroyto lu rişwazire Scott Morrison uli şultonuthayde dmawdın bu qtolğenso dsımwo aclaye bu zabno du qrobo qamoyo dbritho. Mawdıc dcamgabe d’Sidney, a 3 camani gıdmtaybi taglitho hreto bcayni siqumo bi mdito d’Melbourne. Bebzabno a qroyotho lu rişono Amerikoyo Joe Biden bi sbuthathe du qtolğenso kızaydi.

Ucdoste u senator di marcitho d’Kalifornia Anthony Portantino, mıştawtafle li kampanya du talab l’Biden, leşan dmawde bu yarhano bu qtolğenso dan 1915. U senator Portantino mırle; Eşqad u Mawtbo tahtoyo wu Senato mafıtwolın i rmoyto di mawdyonutho bu qtolğensano. İ şultonutho d’ucdo kıtla esore towe caman Armınoye du athro u calathe kıtlan sabro, d’Woşington dmıctarfo bu qtolğensano u dkull noşo dmıştawtıf li kampanya u domır E, Qtolğenso’yo.