Al Raci cabır ba droşe dcama folitiqore d’Lebnon

U fatıryarxo di cito Suryoyto Marunoyto Mor Bışara Butrus al Raci, cabır ba droşe dcama folitiqore d’Lebnon, dheş lo qadiri dımşakli şultonutho hathto bnişo dmisafe u kriz momunoyo du athro.

U fatıryarxo dhawile ytawyotho camu rişwazire Sacıd al Hariri, camu rişqutno Michel Aoun u ğer mşale d’gabe folitiqoye mırle; U camo d’Lebnon kafinoyo u bdele dımvayıc u sabrayde.

Şafıc şabtho, cali lohitho da 18 eşmone dımqadamwole u rişwazire zabnoyo d’Lebnon Sacıd al Hariri lu rişqutno Michel Aoun, leşan dımşakıl şultonutho hathto dqudro dımsafyo a qetre du athro. Elo holucdoste, lo matile al Hariri funoyo cali lohithathe da wazire.

Cali aykanoyuthathe, u fatıryarxo di cito Suryoyto Marunoyto Mor Bışara Butrus al Raci dıkmcaqıb i aykanoyuthathe du athro, hawile ytawyotho frişe cama mşale du athro. Al Raci laqi athmıl u rişqutno Aoun yawmo bıthır mi lqoytayde camu rişwazire zabnoyo al Hariri. Bıthır’ste laqi u fatıryarxo u rişono du Zawco Athronoyo Hiro Gebran Bassil-dıkmıthım dlıktore dmişaklo i şultonutho hathto.

Meqım mi ytawtathe’ste, hawiwole Bassil mamlo camu rişono da Şica d’Hizballah Hassan Nasrallah leşan dorşi a şuşote haroye. Bu mamlo dhawile fatıryarxo al Raci cam Aoun mırle; Kito sniqutho rabtho, du rişqutno u d’Sacıd al Hariri, dmotın l’fhomo haroyo camhıdode. U camo Lebnonoyo kafino’yo, latle şuğlo, dlo sabro’yo udlo haymonutho’yo. U camaydan law kibe fayış dımtahmıl i aykanoyuthathe.

Mor Butrus al Raci mırle; A comure d’Beyrut heş bu haşo du furqoco dhawiwo bu lmino’ne u calathe kito celtho asasi dmişakıl şultonutho dkiba dtucno a şwolani cal katfotha. Ha ma şutose nomusoye du athro-i şultonutho’yo u ahna layban dımdawmina b’belhude b’şultonutho zabnoyto dıkfayışo belhude 6 yarhe cal dkıtyo u athro falç. U dactith du qlimano masroyo bu balans u en kito şuşote, Lebnon lıkowe dfayşo rahıqto menaye.