19/12/2020

U Parlamento d’Beljika krıhle ahjome qaşye d’Azerbaijan cala Armınoye

U parlamento d’Beljika mayadle irmoyto dımqadmo, dıkmıkrıh eba ahjome qaşye dsımla Azerbaijan bu snodo d’Turkiya u da marhıbonayda calan Armınoye du qlimo d’Nagorno Qarabax.

 Bebzabno u parlamento, tlıbleste me Azerbaijan dgurşo a folhayda me Qarabax. Bebzabno an Armınoye mabdelın adyawma 3 yawme haşo, cala 5 alfo dıbhe; beynothaye mdinoye dıqtili ba hjome dsımlın a hayle d’Azerbaijan.

U parlamento d’Beljika, maqbele i rmoyto dımqadmi bi sbutho du qrobo dhawi beyn Armenia u Azerbaijan calu qlimo d’Nagorno Qarabax. Bi maqırhonutho di rmoytathe krihi b’qaşyutho a hçome dsımla Azerbaijan bu snodo d’Turkiya uda marhıbonayda dınqili me Suriya l’Qarabax wu sim qroyto l’Azerbaijan, baroyo dgurşo a folhayda mu qlimo.

Bi maqırhonutho mawdıc, du qlimano kbiş bu haylo ubu cnufyo dsim b’idactho cala mdinoye u dmıstacmıl ba hçomani foqucotho da suğle wu soruhe du fosfor aclaye wu Azerbaijan dışla a prensibe frişe dımbayanwole u ğrob d’Minsk. An Armınoye d’Qarabax kıtte zedqo dhınne dımdabri ruhaye.

Bebzabno bi rmoyathe kmıtlıb mi şultonutho d’Beljika dtulbo me Turkiya dmaklıyo a mudaxalat folhoye dıksaymo la krize, dmıştacyo dawro du tehriwo udu jğuşyo bu qlimo, dmakıyo u şedoro da marhıbonayda d’Suriya l’Qarabax u dgurşo ruha kamiloyith mu qlimano. Camathe’ste tlib d’Beljika wa hadome hrene du Huyodo d’Urifi dımcadri bu bnoyo ubu hethotho da dukotho da mdinoye b’Qarabax u dmitarfın a hbişoye kulle.

Me gabo hreno, Armenia adyawma mabdela 3 yawme haşo cala 5 alfo dıbhe dqtili ba taxtuşe dhawın mqabıl da hayle d’Azerbaijan b’Qarabax. Bcayni zabno, i saqıbloyutho’ste mdawamla u hbosayda cala mşale di şultonutho d’Armenia dmıstacfın ma wolyothathe, cal dlo qadiri dımsafın u şwolo du qlimano.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…