Alhaşd Alşacbi msıke grub de 30 farsufe

Agrube mzayne da Maşılmone Şica du Iraq d’Alhaşd Alşacbi, kımdawmi adyoşaththe mqabıl da mdinoye d’Ninwe bu garbiyo du Iraq.

 Grub mu Haşd da Şabakoye awkith u grub da’30 d’Alhaşd Alşacbi, ba hjome dsımlın cala bote da mdinoye b’Mawsal, msıklın zıd me 20 farsufe u frıslın i zuctho bayn da nacime uda neşe.

 U qentrun Iraqoyo şaryo dkımthabıt agunhe du qrobo, mawdacle du Haşd da Şabakoye awkith u grub da’30 d’Alhaşd Alşacbi, athmıl ba şoce dfothıd safro sımle hjome cala bote da mdinoye dıkhoyın bi xasra yaminoyto di mditho d’Mawsal, u msıkle zıd m’20 farsufe mi fnitho dı Tel Alrumman bıthır mdıfrısle i zuctho bayn da nacime u neşe.

Ahjomani athın luhwoyo bıthır mıtre yawme mi maqırhonutho dhuwolın hın mşale bu qlimo d’Kurdistan dımakadwolın dkito hbuşye ğnize u rmoşe ğalabe da grube mzayne d’Alhaşd Alşacbi dhawın celtho du tewqido udu tenhibo d’bote da mdinoye bi hiğmonutho d’Ninwe.

Bebzabno, mabuce gawoye d’Mawsal bi maqırhonutho dhulın li dafo d’Alcarabi Aljadid, mawdaclın da hjomani latne aqamoye dıksaymilın agrube d’Alhaşd Alşacbi bhaq da mdinoye d’Ninwe, u mathkarlın dmeqım mathe agrube du Haşd da Şabakoye wu grub mzayno du Zawco d’Babilyon hjımwolın cal bote da mdinoye u msıkwolın farsufe dmawbıli l’dukotho dlatne idice. Wa msokani hawın dılo fusqone mu bethdino.

Cali sbuthathe, u qoyumo catiqo bu parlamento du Iraq Majed Şıngali bi maqırhonutho dhule l’Alcarabi Aljadid mırle “u mede dıkhozinale adyawma kmadıl du athro latle şultonutho ba fenyotho d’Ninwe, wi şultonutho lıqıdro dşıryo i sbuthathe, u mawxa klozım dmıstacımlo u haylo laşan dfırso i moruthayda ba fenyothani”. Şıngali makadle di şultonutho d’Boğdod klozım dmawfıqo agrube mzayne kulle ma mdinotho di hiğmonutho d’Ninwe, udmasılmo i wolitho di mşaynutho la pwelıs gawoye da mdinothani.

Mxasra hreto, u rişono di lohitho d’Babilyon bu parlamento du Iraq qoyumo Aswan Alkaldani, mzaharle mu qento du dcoro da haylawotho di Peşmarga uda Asayiş la fenyotho dheş latne safye bu garbiyo du Iraq. Alkaldani bi maqırhonutho dhule lu tboco froso du Iraq mırle “mu zabno di şultonutho d’Haydar Alcibadi uhul ucdo kito hayle folitiqoye dıksaymi hbose, bnişo dmitadcıri ahaylawotho Kurdoye di Peşmarga la fenyotho dlısafın dilonoyith li daşto d’Ninwe. U tedciro da haylawotho Kurdoye u sukolayde suikaste du qatlo, golutho u dyoşe ne dgıdmisomi cala came qalile di daşto”.