Amerika gseymo hboso calu Xaliç laşan u Iraq

U mcadrono di wazirutho di baroyutho du Iraq mawdacle, d’Amerika gıdımcadro u Iraq bu hboso dgısaymo cala hayle du Xaliç, leşan dıqodır u athro dnofıq mu krizano dıkımdawım bu Iraq.

 Me gabo hreno, u rabhaylawotho Amerikoyo bu koalisyon Emwothoyo Kenneth McKenzie m’akadle, dlatte plan dnufqi mu athro hol dıkımşakıl u İran qento rabo bu qlimano kule.

U mşalo Iraqoyo dkıtyo ba droşe du dialog stratejikoyo dcam Amerika Abdul Karim Haşim dkıtyo bebzabno u mcadrono du waziro di baroyutho du Iraq huwle athmıl maqırhonutho u mawdacle, damşale Amerikoye mahwelın dkıtne hadire dsaymi hboso calan athrawotho bnayqyomo du Xaliç, dısundi u Iraq leşan dıqodır dnofıq mu krizano dkımdawım bu athro.

A droşani beyn du Iraq u Amerika a qamoyene dıkmisomi bıthır doro wu nişathe, dmitahti aşwole kulle cali tablitho da droşe; beynothaye i sbutho du momuno du Iraq wu groşo da folhe Amerikoye mu athro uğer. U mşalo Iraqoyo maglele, bu taro da droşani mıte lawyutho dmıgroşi a folhe Amerikoye mu Iraq, elo u planano klozım bi qamayto dmıdrış me qariwo beyn da mşale folhoye da 2 athrawotho.

Bu taro da droşaniste, griş mınyono dfolhe Amerikoye u maslım 6 qentrune la hayle Iraqoye, wu rabhaylawotho Amerikoyo bu koalisyon Emwothoyo Kenneth MeKenzie’ste m’akadle dkıtne bı fusqono kamilo, dlıgnufqi mu athro mcal fothe du hboso du İran-awkith, klozım dımsafın u qetrano da hayle Iraqoye dıkmısnodi mu İran, meqım dmıgroşi mu athro.

McKinsey mahkele cala hçome dıksoyım u İran wa bnayqyomayde du Iraq cala dukothathe bu Iraq u mawdacle, da hjomani kmisomi, cal da haylani lıkqudri d’qumri bu haqlo folitiqoyo u mhanele u tacbo dkobo i şultonutho d’Boğdod leşan dmaqimo u tathir du İran ban arcothayda. Athmılste naqla hreto, nafıl 4 soruhe di Katuşa qariwo li rişizgadutho d’Amerika dkıtyo bu qlimo yaroqo b’Boğdod. A soruhani, mafiri mi maşritho d’al Raşid, hani da 5 naqlat’yo dıkmımhe bu qlimano bı zabno d’10 yawme.