Amerika krıhla ahjome dsimi bu Garbay Madenho d’Suriya

İ wazirutho di baroyutho d’Amerika, bı qaşyutho krıhla ahjome dsimi bu garbay madınho d’Suriya. Ba hjomani dsimi b’Cızaz, al Bab u b’Afrin mawdıc dqtılwo hol 20 farsufe; beynothaye tloye.

 Bi maqırhonuthathe Amerika mawdacla u ğamayda, cala hjomani dzayidi ba yarhe haroyani bu garbay madınho d’Suriya.

Bi mawdconutho dıfrısla athmıl i wazirutho di baroyutho d’Amerika, mahwela hfuxyo qaşyo mqabıl da furqoce haroye dhawın ba mdinotho d’Cızaz, al Bab ubi mdito d’Afrin bu garbay madınho d’Suriya. Mawdıc ba hjome dsimi ba 3 mdinothani, hawın celtho lu qatlo dhol 20 farsufe; beynothaye tloye.U malolo di wazirutho di baroyutho Ned Price mırle; Amerika kıtucno ğamo jıddi bi sbutho da hjome dhawın ba yarhe haroyani wu isticmal da foqucotho dıkmitahti cala darbone.

Hani dıktucni i mşalutho du cnufyano, klozım dmihaşwi cal da camlani qentone lu camo u kımhadıdi u terkiwo di mşaynutho du qlimano.Yawme d’Şabtho dşafıcina, mfarqacwo radoyto bi mdito d’Afrin dkıtyo me 2018 bu duyoqo da hayle kaboşe d’Turkiya uda marhıbonathe. Bu furqocano qtılwo 8 farsufe; beynothaye 4 tloye. Bıthır yawmoste hawiwo furqoce b’Cızaz u b’al Bab dkıtne haniste bu duyoqo da marhıbone d’Turkiya.

Amerika meqım kımo yawme, krıhwolaste u qatlo barbroyo d’2 neşe-Hınd al Khudır u Sacda al Hermas dkıtwın mşale b’hiğmonwotho di Mdabronutho yothoyto. A ğrobe marhıbone d’Dacış nhırwolın a 2 neşani bşıkıl barbroyutho rabtho. Bu zabno d’Turkiya kımdawmo dmaqwıyo i ithuthayde bu garbay d’Suriya, kımdawmo’ste a cuqobayde calu garbyo du Iraq b’nişo dmıhyo u gerilla di PKK.

Hol ucdo a cuqobani da Turkoye misomiwo qariwo la thumayda hedor Nuhadra wa turonayda, elo adyawma safrayto sımlın a tayosyotho d’Turkiya cuqobe cali qritho d’Pışdar dkıtyo qarıwto li mdito di Suleymaniye. Ba cuqobani lo madıc u husrono dhiw elo kımadili, cali çasara dhawila Turkiya uda mşale du qlimano, lıkmaklalla. Ba cuqobe dsımla Turkiya cala qıryawotho d’Nuhadra; beynothaye qıryawotho du camaydan, qtil hol 7 mdinoye.