09/10/2020

Amerika mahıtla tedbire casye calu athro du İran

Kımo şabe meqım ma guboye du rişono d’Amerika, mahıtla i şultonutho du rişono Donald Trump, tedbire hathe calu haqlo da bankat du İran bnişo dmitadcıf u momuno du athro.

 İ wazirutho di xazina d’Amerika makadla, dmahıtla tedbire cal 18 bankat frişe du İran. A tedbiraniste gıdmathri calu sistem du momuno du İran dkıtle hol 80 milyone dıbnaymothoye dıkşufci ucdo baykanoyutho casqo mu virus di Corona.

İ wazirutho di xazina d’Amerika, bi maqırhonutho dıfrısla athmıl mawdacla dmahıtla msombrişo u tedbire casye cal 18 bankat frişe du İran. U nişo da tedbirani dmahti calu sektor da bankat du İran, dmitarhıq u İran zıtır mu sistem Emwothoyo da bankatyo.

A tedbirani dcala 18 bankat rabe du İran, kibın dmawfıqi u İran wa bnaymothayde mu sistem Emwothoyo da bankat. Bi maqırhonutho dhuwle u waziro di xazina Steven Mnuchin cala tedbirani dmahti calu İran mırle; Bi netije da tedbirani, mahıt mnoco calu İran dmıstacmıl a zuze d’Amerika u dolar. A tedbirani gıdmdawmi, hol du İran dmakle u snodayde li marhıbonutho u dmakleste i tahraztayde du nukleer.

İ şultonutho d’Tehranste bı qaşyutho krıhla a tedbirani dmahti ucdo bu zabno du pandemi di Corona. U waziro di baroyutho du İran Mohammad Javad Zarif thımle Amerika dkımnasyo dmahrıwo a kanale dkıtle u athro leşan dobe u timo du muklo uda darmone lu camo İranoyo. Zarif mırle; A İranoye, gıdmaxlısi mu haşo umi barbroyuthathe d’Amerika. Elo i xiyene dıkmisomo leşan u camo kulo dmoyıth mu kafno, hawbo mqabıl di noşuthoyo.

U waziro di baroyutho d’Amerika Mike Pompeo mırle; A tedbiraydan baroyo mqabıl du rejim u da fqide dıkmaşın fassadyo u dıkmıstacmıli i catirutho du camo İranoyo leşan u snodo du haylo tuxmonoyo dhawi celtho lu haşo rabo dkito adyawma bu Madınho Mescoyo u hedore. U İran me darbe dmahıt u gayso bi qadmoyutho dkul mede, kibe dımşawşıt u haqlo du hulmono u da bethkrihe du athro.