Amerika maslamla lu Iraq lohitho a noqazyotho d’ Alhaşd Alşacbi

Taşroro Britanoyo maglele d’Amerika maslamla lu Iraq lohitho, dkiba 80 nuqazyotho u qentrune da grube mzayne d’Alhaşd Alşacbi dıkmısnodi mu İran.

 Camgabıdathe, u rişizgado catiqo d’Amerika bu Iraq Rayan Kroker, mawdacle d’Waşington klozım dturyo i rişizgaduthayda ftıhto b’Boğdod, u dımsaybıro leşan dsundo i şultonutho du rişwazire Mustafa Alkazimi.

 İ dafo Britanoyto d’Middle East Eye bu taşroro dıfrısla mawdacla d’Amerika mbayanla lohitho d’80 nuqazyotho da grube mzayne dıkmısnodi mu İran, wu ucdo kdurşo dsaymo hjomo cala grubani en dımdawmi ugzomathe cali rişizgadutho d’Amerika b’Boğdod.

A dukothani baynothaye qentrune ğnize u ğer dkıtne tahte di arco, mitıstacmıliwo meqım mu rişono di Mtakasto d’Badır Hadi Alcamiri wu rişono d’Casaeb Ahıl Alhaq Qays Alxaz cali, u kitoste qentrune masre ba ğrobe d’Hizballa du Iraq. A 3 grubani dkıtne da Şica kmısnodi mu İran u kımathli falqo ma hayle d’Alhaş Alşacbi dıklozım dhowın bi morutho di şultonutho d’Boğdod.

U taşroro Britanoyo grışle u zuhoro cal mşale folitiqoye u rişone dı grube mzayne Iraqoye, mathkarlın du waziro di baroyutho d’Amerika Mike Pompeo, ba esore dhawile camu rişqutno du Iraq Barham Salıh 20 bu yarho d’İlul dşaficina, mbahaswole cal mowat d’surotho dıgrişi mu satelit cal 80 qentrune d’Alhaşd Alşacbi. Pompeo mawdacwole l’Salıh d’Amerika kıtla i tahrazto dsuxro i rişizgaduthayda bu Iraq, ida dlo maydo i şultonutho d’Boğdod tedbire dmitaklın a hjome dıkmisomi cali fnitho Yarıqto u cala konvoye dıknuqli mcadrınwotho la hayle du koalisyon Emwothoyo.

Cali sbuthathe, folitiqoyo idico ma Şica Maşılmone du Iraq dılo maglele cal ışme mırle; İ egartho d’Amerika qrıhtowa, ida dlo saymıt mede, i naqlayo ahna gıdsaymina u medano. Lfuth i dafo Britanoyto, dothe Amerika dsuxro i rişizgaduthayda b’Boğdod, i mıcnayde gıdhowe qrobo ftiho bi arişkoyto wu maşıqlo folitiqoyo wu momuno gıdmıshofi wi fliğutho beyn da mathabe u da came umthoye gıdqoşın.

Megabo hreno, u rişizgado catiqo d’Amerika bu Iraq Ryan Crocker, bi maqırhonutho dhule mawdacle du sxoro di rişizgadutho d’Amerika gıdhowe mede dıha laybe mıtyaqanle, u klozım i mdabronutho d’Waşington dımqafyo darbone lu snodo du rişwazire Mustafa Alkazimi. Crocker mırleste; Amerika klozım dhowela msaybronutho stratejikoyto bu Iraq u bu madınho dilonoyith i naqla dhowela bu Iraq şoriko xıd Alkazimi. Alkazimi latyo huwe i celtho da qetre du Iraq, elo kito casquwotho rabe bu qlimo dkıtne sniqoye l’zabno yarixo leşan dmışrın.