Amerika mawdacla dıksındo dhowe diyalog bayn Darımsuq wa haylawotho d’Suriya demoqratoyto

WASHINGTON — Bi maqırhonutho dhula athmıl la gelyunore b’Waşington, i malılto di wazirutho di baroyutho d’Amerika Tami Brus mawdacla d’Amerika kımdawmo d’sındo u diyalog bayn di şultonutho d’Suriya wa haylawotho d’Suriya demoqratoyto, bnişo dhowe mlahmonutho bayn d’QASAD wu gayso d’Suriya. 

Brus m’ayadla ste a’knuşye msimone kulle dhawın bayn d’QASAD wu rişqutno d’Suriya Ahmad Alşarıc, u makadla d’Waşington ksındo u mabco dkıtlın a’haylawotho d’QASAD dımşahılfi i şalyuthzayno ducdo bu garbay madınho d’Suriya l’şlomo kamilo u aminoyo. 

Bebzabno, Brus mşalatla bahro cala fulhone deblomasi dkımdawım u mathlono Amerikoyo Tomas Barrack dsamlın, bnişo dmıştawtıfi a’gabe u tarafe kulle lu maşıqlo folitiqoyo hatho, udmisım u garanti di mşaynutho udi şalyutho la Suriye kulle. 

I maqırhonuthathe d’Brus athyo luhwoyo bıthır mu mamlo dsımwo bu video bayn du hadomo di kongre d’Amerika Abraham (H)amada wu rişono gawonoyo d’QASAD Madhlum Cabde. 

Lfuth u buyono dıfris bi dafo d’X, Hamada dkıtyo hadomo bu mawtbo tahtoyo di konge d’Amerika mu gabo Qutnuthoyo, bu mamlo dhawile cam Cabde mqalasle a’haylawotho d’QASAD dkıtne bnayqyomo rişoyo l’Amerika, u makadle ste da droşe bayn d’QASAD u Darımsuq gıdmitaybi m’hatho bu yarhano bi mditho d’Paris bu snodo di mdabronutho du rişono d’Amerika Donald Trump. 

Hamada ba droşe dhawile cam Cabde, makadle ste d’QASAD falqo asasine mu dactid d’Suriya u mırle “b’gawıd d’zabno dıkdocır l’zıd m’10 ışne, QASAD sımlın u sutoro du garbay madınho d’Suriya dkımşakıl ha ma tlotho sahme da n’arcotho du athro, u mşataslın ste tefso standard lo qentrunoyo dıkmastır a’Mşihoye, a’Caraboye wa Kurdoye u ğer came”.