Amerika mawdacla dlıgımcawni u athro d’Turkiya

İ wazirutho du sutoro d’Amerika-Pentagon mawdacla, d’Waşington lıgımqadmo mcadronutho oyaroyto l’Turkiya bu taro da taxtuşe dqaşın bu qlimo d’İdlıb bu garbay macırbo d’Suriya.

 Camgabıdathe, Pentagon mawdacla dhuwla bahro yaroqo leşan dmişare bu groşo da hayle Amerikoye mu athro d’Afğanistan.

U waziro du sutoro d’Amerika du Pentagon Mark Esper, mawdacle du athrayde lıgımqadım mcadronutho oyaroyto l’Turkiya ba cuqobe folhoye dıksaymolın bi fnitho d’İdlıb b’Suriya. Esper bi maqırhonutho dhule la gelyunore bu qentrun du Pentagon mırle “Amerika gdımnasyo dmazido i mcadronuthayda i noşoyto l’Turkiya bıthır mu hçomo dıqtılwo ebe 33 folhe Turkoye i şabtho dşaficina”.

Bu funoyo dhule calu şuwolo ida dbayn da mcadronwotho Amerikoye l’Turkiya gıdhowe snodo oyaroyo, Esper mırle lo. U mawdacle ste dıdrışle camu notarrozo gawonoyo du Nato i aykanoyutho d’Suriya, u mathkarle du Nato makadle dkıtyo hadiro layna şuşoto dhowe b’Suriya.

Megabo hreno, u waziro du sutoro d’Amerika mawdacle dhule bahro yaroqo lu rişono da haylawotho Amerikoye dkıtne b’Afğanistan, laşan dımşarın dmıgroşi mu athro. Esper mırle “u groşo klozım dımşare b’zabno d’10 yawme bıthır mu qyomo du şlomo dımdewo camu zawco dı Taliban yawme d’şabtho dşaficina”.

Esper mawdacleste du rabhayalwotho d’Amerika b’Kabul general Skor Miller mbayn da 13 alfo folhe Amerikoye kıtle u zedqo dımşare dgorış haylawotho hol lu thumo d’8 alfo u 600 folhe. Esper makadleste d’Amerika gıdmahwiyo klayto msimonitho u gdımşaryo dgırşo a’haylawothayda m’Afağanistan.

Amerika meqım kımo yawme mdewola bi mditho d’Aldawha b’Qatar qyomo du şlomo camu zawco dı Taliban, laşan dmişare dmıgroşi a’haylawotho Amerikoye m’Afağanistan.