Mılın a citotho du Daşto d’Ninwe mu cameydan bu şuroyo du sawmo

Camu şuroyo du sawmo dan arbıci yawme, ba mowat dımhaymıne mu camaydan maftelın fothaye lafa citotho mşahılfotho di daşto d’Ninwe bu garbiyo du Iraq.

 Cıl mıd kito zuhoro du kewo du virus d’Corona, elo u camaydan di daşto bı haymonutho rabtho kmıkfıx la citotho ba yawmani a mqadşe.

 U sawmo mqadşo da narbıci yawme mşarele athmıl bu Iraq, wu camaydan di daşto d’Ninwe bı menyono celoyo kfix cala citotho mşahılfotho di daşto, laşan dmaqım slawotho u teşmışyotho, udıtolıb me aloho dmarku uşlomo wi mşaynutho gawonoyith bu Iraq.

Ucıl mıdmawdıc du kewo du virus d’Corona fris bı menyono ma hiğmınwotho du Iraq, elo naqla hreto u camaydan di daşto b’haymonutho rabtho lıqtic ma citothayde dilonoyith ba yawmani du sawmo mqadşo.

Ba yawmani acitotho di daşto d’Ninwe kımtaybi qerowe alohoye ğalabe, ukul yawme d’cruto mkul şabtho kmitayıb u tekso du zawho du slibo b’gawıd da citotho.

U kohno di cito Suryoyto Qatholiqoyto xuroyo Nuel Alqas Tuma, bi maqırhonutho dhule li dafo d’Yezidi 24 mırle “a’yawme du sawmo kmıhşowi ma zabne ulsoye ba haye du barnoşo laşan dmandıf ruhe mi htitho. U sawmo bi mardutho Mşihoyto ha ma nasase da haye yo. Ba yawmani u barnoşo kfoyış masro cami slutho, kmahwe awyutho cama faqire uksoyım fulhone msimone udi mcadronutho”.