Amerika mawdacla klozım Lebnon seymo şuhlofe folitiqoye

Amerika mawdacla di aykanoyutho d’Lebnon matyo lu darğo haroyo dkulle du hrowo, u makadlaste dıklozım Lebnon dsaymo şuhlofe folitiqoye leşan dmitahwela mcadronutho Emwothoyto.

 Megabo hreno, u rişqutno d’Lebnon Mişel Caun dımdafacle Hizballah mqabıl du fusqono du bethdino Emwothoyo d’Den Haag, Fransaste mawdacla du fusqono du bethdino d’Alhariri klozım dfoyıt la haye.

 U wakilo di wazirutho di baroyutho d’Amerika David Hill, bu knuşyo dsımle lu tbocofroso b’Waşington mırle;u camo d’Lebnon khoze da rişone folitiqoye kmıstacımli u rejim leşan dımzangıni ruhaye u dımacımsi caynothaye cala talabe du camo. U zabnawo tayım, u lıfayış zuze leşan dmisım u medano. Ucdo i aykanoyutho d’Lebnon matyo lu darğo haroyo dkule du hrowo, u kmıtyaqano da rişone folitiqoye ucdo yaste ba yawme dıbqamuthayna gıdmıtyaqni hınne dathi u zabno du şuhlofo. U dothe dlowe u medano ono kmıtyaqano b’darğo rabo du camo Lebnonoyo gıdmozıd u hboso cala rişone folitiqoye.

Calu şuwolo dmın dawro gıdhowele u gabo d’Hizballah bi şultonutho d’Lebnon Hill mırle; Waşington hawila meqım mahwo u şqolo cam ğalabe şultonwotho dkıtwo b’gawaye hadome d’Hizballah, u en dmikarır u medano Amerika gıdorşo i sbutho. A şuhlofe dıklozım dmisomi mqabıl da yuthrone da gabene dkıbci dfayşo i aykanoyutho d’Lebnon xıd kıtyo ucdo, beynothaye Hizballah dıkmıhşou adyawma falqo rabo mu kriz d’Lebnon.

Calu fusqono du bethdino d’Rafiq Alhariri, u mşalo Amerikoyo mfanele; Ahna kımaydina dmimıd hşowo me Salim Cayyaş, u hano idicowe b’Hizballa wu ktılbina mi şultonutho d’Lebnon dmasılmole lu bethdino.

Megabo hreno, u rişqutno d’Lebnon Mişel Caun mayadle dfoyış u zayno bidothe d’Hizballah u mırle; u zayno lıgıdmıgrış me Hizballa hol dıkmdawmo İsroyel a hjomayda cala arcotho d’Lebnon. Dothe dmimadwo u zayno d’Hizballah man gdımdafacwo Lebnon. Caun bi maqıblonutho dsimo acme, mawdacle du fusqono bethdino d’Den Haag laybe kinutho, bıthır mıd şafıc 15 eşne calu qatlo d’Alhariri.

Mexasra hreto, u waziro di şultonutho d’Fransa dcala sebwotho baroye John Lumwan, mawdacle du fusqono du bethdino d’Alhariri klozım kulonoyith dfoyıt la haye. U waziro sımle adyawma socurutho l’Beyrut xıd dewam di socurutho du rişqutno Emannuel Macron udu waziro di baroyutho Jean Yves Le Drian.