Amerika mhanela i netije dnafiqo mu knuşyo du Xaliç

Anathrawotho du Xaliç bu huthomo du knuşyaththe dımtayıb athmıl bi Scudiye, matın lawyutho dmahti ido bido mqabıl da tehdide du İran, u tlıblınste dmişarır u maşıqlo folitiqoyo hatho d’Suriya.

 Amerika bu hfuxyo dmahwela mhanela i netije du knuşyo du Xaliç, u mawdacla dbalhude u İran yo dgıdhoze husrono mi awyutho dhawyo bayn da nathrawotho Caraboye du Xaliç

 U mawtbo celoyo du mawtbo di methcadronutho du Xaliç, bu buyono dıfrısle athmıl bu huthomo du knuşyo da rişonayde, makadle i mlahmonutho dkito bayn da nathrawotho Caraboye du Xaliç wu dcoro da nesore dbaynothaye lu kyonathe.

U mawtbo celoyo du Xaliç bu buyonayde makadle dıkrofıd kul şıkıl d’mudaxala nuxroyto dıkmisomo ba sebwotho gawoye da n’athrawotho Caraboye, dmitaklın a’fulhone du hurhoşo udi fıtne dıktıfki i fnitho lafu qrobo, udmitahwe iqoro li morutho da n’arthrawotho Caraboye wa diloyothaththe.

Camgabıdathe, u mawtbo celoyo du Xaliç makadle i klayto dkıtle bi sbutho du kriz d’Suriya, u mawdacle dıklozım dmınqıl u athro lu maşıqlo folitiqoyo hatho lfuth a’prensibe d’Çenev 1 wu fusqono du mawtbo di mşaynutho d’Emwotho Mhaydotho da 2254. U buyono makadle ste dıklozım dmitayıb nomuso esonoyo hatho l’Suriya, udmıftıh u darbo b’qamuthıd da guboye, bnişo dmibayın dactid hatho dkımşarır u nişo dkıtle u camo d’Suriya.

Bebzabno, u buyono du Xaliç mawdacle dıksonıd a’fulhone emwothoye du tedciro da galwoye Suriye la fenyothaththe, u makadle ste dıkrofıd dmisım şuhlofe demoğrafoye b’gawıd d’Suriya.

Ba hfuxye dmahwın cali netiçe du knuşyo du Xaliç, Amerika mhanela i awyutho dhawyo bayn da n’athrawotho du Xaliç, u mawdacla du medano dawse msimonoytoyo lafu dcoro di hdoyutho Caraboyto udu Xaliç. İ wazirutho di baroyutho d’Amerika bu buyono dıfrısla mırla “kul naqla kımakdina di hdoyutho du xaliç kmamtiyo camruha şuşoto u quyomo bu haqlo di tagorutho uda mşablınwotho udi mşaynutho du camayde”.

M’gabo hreno, u sinator qutnuthoyo Lindsy Graham mahnele u rişono d’Amerika Donald Trump wu grubayde bi rişonutho d’Garid Koşner, cali netiçe du knuşyo du Xaliç wu şroyo da qetre bayn di Scudiye u Qatar.

Sinator Graham bi maqırhonutho dıfrısle bi dafayde du Twiter mırle “u İran u athro dgıdhoze u husrono rabo dkulle mi awyutho dhawyo bayn da n’athrawotho du Xaliç. Laybe fayış dqathla yuthrone mi fliğutho dkıtwo meqım bayn da n’athrawotho du Xaliç”.