Amerika mzaharla u rejim d’Suriya mqabıl du qento du virus di Corona
Amerika mzaharla Suriya mu qento du bırbozo du virus d’Corona b’şıkıl mahişono, bu zabno dkımdawmo i şultonutho bu hboşo d’olufe mdinoye baynothaye Amerikoye.
U zuhorano d’Amerika athi luhwoyo bıthır mıdmawdacla i şultonutho dı Darmsuq du kewo d’Corona tafi lhın farsufe b’Suriya.
İ malılto di wazirutho di baroyutho d’Amerika Morgan Ortagos bu buyono dıfrısla lu tboco froso, sımla qroyto lu rejim du rişqutno d’Suriya Başşar Alasad dımhalıq dawsat ulsoye, bnişo dmisım u sutoro du dactid d’olufe mdinoye baynothaye Amerikoye dkıtne hbişoye dılo asas qonunoye, udıkhoyın b’aykanoyutho lo noşoyto b’gawıd da hbuşye du rejim.
Ortagos mırla “a’şartat dkito ba hbuşye du rejim d’Suriya kımmathli arcutho tawto lu bırbozo msarhıbo du virus d’Corona, wu medano gıdmamte camruhe netije ğalabe mahişonitho la hbişoyani dkıtne u falqo mhilo dkulle du kenşo d’Suriya, cal dhani ışne kmisomi teşniqe, ukcayşi b’kafno udlo hulmono”. Callathe, i malılto di wazirutho di baroyutho d’Amerika tlıbla mu rejim d’Suriya d’baroyo dmarfe a’hbişoye mdinoye baynothaye neşe u nacime u sobe. Ortagos mawdaclaste du rejim klozım dımbayın mkone la şutose şarye baynothaye a’şutose du hulmono, dqıdri dmotın l’gawıd da hbuşye.
Bu huthomo du buyonayda, Ortagos mawdacla dıklozım u rejim d’Suriya dmoyıd tedbire msarhıbe, laşan dmisım u sutoro du camo d’Suriya uda bnaymothoye Amerikoye dkıtne a’hayaththe b’qento rabo mu bırbozo du virus d’Corona b’gawıd du athrano.
22 bu yarhano, u waziro du hulmono d’Suriya Nizar Yazaji makadwole du kewo d’Corona tafi l’farsufo b’gawıd d’Suriya. U athmıl i şultonutho dı Darımsuq mawdacla du menyono da bnaymothoye dqayıthlın u virus d’Corona mati l’hamşo farsufe b’Suriya.