Alzurfi yatıw cama mathlone du mawtbo di mşaynutho
U rişwazire du Iraq dımbayın laşan dımşakıl i şultonutho hathto Cadnan Alzurfi, yatu cama mathlone da nathrawotho dkıtlın hadomutho aminoyto bu mawtbo di mşaynutho d’Emwotho Mhaydotho.
Bi ytawtathe, bayn da sebwotho mşahılfe dıdrişi kıtwo u qento du kewo d’Corona wu tedciro da galwoye la fenyothaththe.
U rişwazire du Iraq dhiw teklif dımşakıl i şultonutho hathto Cadnan Alzurfi, yatu athmıl bu qentrunayde bı Boğdod, cama mathlone da n’athrawotho hadome aminoye bu mawtbo di mşaynutho d’Emwotho Mhaydotho udkıtne Amerika, Rusya, u Sin, Fransa u Britanya.
Bi ytawtathe, drişi a’krize dıkloqelın u Iraq wa n’athrawotho qlimoye udıbritho mfothıd du bırbozo du virus d’Corona wu tathirayde calu momuno ucalu timo du nafto bi şuqo tibeloyto wu dactid da n’esore emwothoye bu taro da krizani.
Alzurfi bu mamlo dsımle, mahwele i hzaytayde bi sbutho du şekolo d’şultonutho athronoyto dkımmathlo agawne mşahılfe du camo Iraqoyo, şultonutho dkıtla mkono u haylo dnıfqo mqabıl da krize gawoye u baroye du Iraq, u makadleste dıklozım dmitahwe funoyo la talabe da mtagılyone du protesto.
Be bzabno, Alzurfi makadle dmisım guboye hire u şafye msarhıbe bi methcadronutho d’Emwotho Mhaydotho, guboye dkımmathli b’kinutho a’came mşahılfe du Iraq. Alzurfi makadleste dıklozım dmimıd u zayno ma grube mzayne ubalhude dhowe u zayno bidothıd di şultonutho, dmisım u hethotho da fenyotho shife udmitadcıri agalwoye la botaththe.
Bu huthomo du mamlayde, Alzurfi tlıble ma n’athrawotho hawrone du Iraq dsındi i şultonutho hathto dgımişaklo mqabıl da krize dkito bqamutha.