Amerika tlıbla me Turkiya mu Iraq dhowın sanode dmişatıs mdabronutho dilonoyto l’Şigur

İ wazirutho di baroyutho d’Amerika tlıbla me Turkiya u mu Iraq, dhowın sanode bi sbutho dmişatıs mdabronutho dilonoyto li fnitho d’Şigur bu garbiyo du Iraq.

 Megabo hreno, i mdabronutho d’Ninwe fsıqla dmişatıs sictho qentrunoyto leşan u bnoyo u hethotho d’Şigur.

U waziro qamoyo dkıtyo mşalo ba sebwotho du madınho mıscoyo mi wazirutho di baroyutho d’Amerika Joey Hood mawdacle dhule renyo u tlıble me Turkiya u mu Iraq dhowın sanode dmişatıs mdabronutho dilonoyto li fnitho d’Şigur. İ sbuthathe Hood drışole u mawdıcole l’Turkiya u lu Iraq bu knuşyo dhawi bu darbo du nawlo 19 bu yarhano d’Ob.

İfnithathe klozım dmitandıfo ma grube frişe dıktucni zayne u dmişatıs mdabronutho dıkmitaqıblo mu camo di duktho. Me gabo hreno, u rişono di mdabronutho folhoyto d’Ninwe rabhaylawotho Jabbar Altayi, bi maqırhonutho dhule lu tbocofroso, mawdacle di mdabronutho mtayabla lumodo dilonoyo, leşan dmıdroşo eba i aykanoyutho di mşaynutho u di mşablonutho b’Şigur.

U lumodano sim bi rocyutho di mcadronutho du rişono di mdabronutho folhoyto du Iraq rabhaylawotho Cabdılamir Alşammari, u mıştawtaflele menyono ma mşawrone du rişwazire Mustafa Alkadhimi, mathlone mi wazirutho di galwoyutho u mu şutoso da sohde, u hiğmuno d’Ninwe u menyono ma mşale da şutose ruşmoye d’Ninwe, u ba casrowat d’Ezidoye.

Rabhaylawotho Altayi bi maqırhonuthayde, mawdacleste bıthır mıd msanıt la hzayotho u la fuşoqe mşahılfe, amıştawtfone du lumodano mbayanlın menyono d’fusqone bnişo dmitarkıwo i mşaynutho b’Şigur, beynothaye dmişatıs sictho qentrunoyto dıkmiaydo mu rişwazire Iraqoyo leşan u bnoyo u hethotho d’Şigur. Bebzabno, a mıştawtfone fsıqlınste dmıftıh ba yawme dıbqamuthayna makıthbo lu şutoso da sohde u li wazirutho di galwoyutho b’Şigur, bnişo dmiqaydi a Ezidoye bi ruşmoyutho bu Iraq.