Barham Salıh u Florans Parli hawilın ytawto camhıdodhe

U rişqutno du Iraq Barham Salıh, bi ytawto dhawile cami wazırto du sutoro d’Fransa Florans Parli, makadle cali ulsoyutho dmısnodi a fulhone du Iraq, leşan u sutoro di moruthayde u dmitaklın a dyoşe folhoye cala arcothayde.

 Mxasra hreto, u rişwazire Mustafa Alkazimi mıstaqbele u waziro di baroyutho di Scudiye, u drışle acme aydarbo kibe dmişawşıti anesore beyn da tıre athrawotho.

 İ wazırto du sutoro d’Fransa Florans Parli, sımla socurutho li arişkoyto du Iraq, leşan dmahwiyo u snodayda li şultonutho hathto d’Boğdod dıklıqyo kriz bu haqlo folitiqoyo, momunoyo u du hulmono. Parli athmıl laqyo u baramnayda du Iraq Jumca Cinad, u rişwazire Mustafa Alkazimi u rişqutno Barham Salıh.

Salıh bi ytawto dhawile cami wazırto Franşoyto, makadle cali ulsoyutho dmitaklın adyoşe folhoye d’Turkiya calan arcotho du Iraq, u mawdacleste da hjomani dyoşo qrihoyo la qonune d’Emwotho Mhaydotho u la esore dbeyn dan athrawotho şbobe. İ maqırhonuthathe d’Salıh athyo lu hwoyo bu zabno du ajans da tebe du Iraq mawdacle da tayosyotho Turkoye sımlın hjome hathe calu qlimo d’Kurdistan du Iraq.

Camgabıdathe, Parli mawdacla d’Fransa hadırtoyo dımdawmo bi tahrazto da droşe da hayle Iraqoye, bnişo dmişawşıti amkone folhoye du gayso du Iraq wu nfoqayde mqabıl da hjome. Adyawmaste i wazırto sımla knuşyo la gelyunore camu rişono du qlimo d’Kurdistan du Iraq Neçirvan Barzani b’Arbil.

Bu mamlayda Parli makadla dıklozım dmiyaqro i morutho du Iraq u dmitakılyo i mudaxala baroyto dıkmisomo ba sebwotho gawoye du athro ma hayle mşahlıfe du qlimo. Mxasra hreto, u rişwazire du Iraq Alkazimi athmıl mıstaqbele, u waziro di baroyutho di Scudiye amiro Faysal Bın Farhan Bın Cabdalla wi taşdartayde. Bi ytawtathe, drişi anesore beyn Boğdod u Riyad, u aydarbo kibe dmitaqwın a esore beyn da 2 athrawotho ba haqle mşahılfe.