Amerika u Sin simlen awyutho dmanqısi u timo du gumruk hol zabno d’90 yawm

Ba droşe dhawın athmıl beyn da taşdaryotho d’Amerika udu Sin bi mdito d’Geneve d’Swisra, matın a 2 gabe l’awyutho dmanqısi hol zabno mbayno, u timo celoyo du gumruk dmahıtwolın a 2 athrawotho calu mal dıkmişadır lhıdode bu haqlo di tagorutho. Bebzabno Amerika u Sin mawdace bu knuşyo dsim lu tbocofroso, dkıtte plan dımdawmi a droşani leşan dmibayın şartat mşawtıfe di tagorutho.

Bu mamlo dsımle u waziro du momuno d’Amerika Scott Bessent mırle; A 2 gabe mahwelın iqoro rabo u mte l’awyutho, dmihadıd ucdo u timo du gumruk. Kıtlan plan u mabdelan maşıqlo u camhıdode mbayanlan mekanizma, dımdawmi a droşani 

Amerika dmahıtwola gumruk b’timo d’145 ba mo calu Sin, manqasla ucdo 30 ma mo mene bıgawe da 90 yawmani.

Camathe’ste u Sin manqasle 125 ba mo mu timo du gumruk dmahıtwole cal Amerika u gıdfoyış ba 90 yawmani l’10 ba mo. U şuhlofano dsim’ste, m’atharle msimono cali borsa dbritho. Elo camathe i şultonutho du Sin dhawila ytawyotho cama rişone dhın man athrawotho d’Amerika i Latinoyto udı Karibbia b’Bejing, drişo i sbutho du timo du gumrukano dmahıtwola Amerika u sim sturyo.

Ba droşani, mbayanle u Sin xtuto du kredit d’9.2 milyare dolare lan athrawothani d’Amerika i Latinoyto u l’Karibbia. U kredit’ste gıdhowe ba zuze du Sin-yuanen, leşan dlo nofıl u timo da zuze du Sin mqabıl du dollar. Walaw u Sin wu Amerika i Latinoyto rahuqe’ne me hdıdode bi geoğrafia, elo a esorathe towe’ne. U Sin huwle şudoyo’ste, dgımaqım i viza beyn du Sin uda 5 athrawothani d’Amerika i Latinoyto.