Amtagılyone bu Iraq madrelın asurotho da rişone İranoye dkıtwın mcalqe ba mdinotho

A mtagılyone du Iraq madrelın asurotho da rişone İranoye dmahti bhın ma mdinotho Iraqoye bu zabno da hfitwotho dımtaybi bu ışmo u yawmo tibeloyo d’Alquds awkith d’Urışlem.

 Be bzabno, hın ma qoyume Iraqoye dıkrıhlın u tehito da surothani, mawdaclınste dıkrıfdi dhowe u Iraq danwo lu İran.

 Mqabıl di mudaxala İranoyto ba sebwotho du Iraq, amtagılyone Iraqoye di hiğmonutho dı Diyala dhawın ruğzo, madrelın surto rabtho l’Ayatullah Alxumeni dmahto ma grube bnayqyome du İran, bi cohnutho di hfitutho dışma u yawmo tibeloyo d’Alquds d’Urışlem dkımcayadwola u Xumeni mi şato da na’1979 udkımdawmo hul ucdo.

 Bu vidyo dıfrıslın ahfite mdinoye ba dafe du facebook, kmahwe da clayme Iraqoye kmadrın i surto du Xumeyni u kımhawri lo la gabe.

 Bu hfuxyo gawoyo dmahwe, qoyumo bu parlamento du Iraq mi hiğmonutho dı Diyala, krıhle u qedomo dhın ma gabe du Iraq dıkmahti surotho dhın farsufe dlatlın esore camu Iraq, u makadle di mditho dı Diyala hiğmonutho Iraqoytoyo ulatyo masırto aw danwo lu İran.

 U qoyumo Racıd Aldahlaki bi maqırhonutho dıfrısle bi dafayde du Twiter mırle; Ahna lıhzelan u İran yawmo dhule amro dmımhe soruhe aw buğro ha b’İsroyel. Elo u İran meqım u ucdoste kımdawım b’celotho mşahılfe d’zorıc i fıtne bu Iraq ubanathrawotho hrene Caraboye”.

 Meqım matheste, amtagılyone Iraqoye mu zabno dmabdewolın aprotestawiye bu yarho dı Tışrin u Qadmoyo dşaficina mawqadwolın u maqımwolın ba casrowat d’surotho da rişone İranoye. Ubu yarho dı Tışrin u Haroyo dşaficina, amtagılyone Iraqoye madrewolın luho du reklam dıkthıwo acle u zabuqo d’Xumeyni bi hiğmonutho d’Alnajaf, u mahıtwolın luho hreno mdarbe bu ışmo “u zabuqo da sohde du qawmo dı Tışrin”. Ube bzabno amtagılyone mawqadwolın atarte izgadwotho İranoye dkıtne bi mditho d’Alnajaf ud’Karbala.