Amtagılyone rfıdlın dmiraşıh farsufo dlowe şaryo li rişwazirutho

Amtagılyone du Iraq dlayimi athmıl bu wahdo d’Altahrir bı Boğdod naqla hreto rfıdlın dmiraşıh farsufo dlowe şaryo li rişwazirutho di şultonutho hathto.

Atagılyothani du protesto athın luhwoyo bıthır mıdmawdıc dkito awyutho bayn da gabe Iraqoye calu ışmo du mraşho Nacim Alsuhayl dkıtyo u mcadrono du rişono du diwan di rişqutnutho dımşakıl i şultonutho hathto du Iraq.

Cıl mıdkito mnoco du cboro nfoqo bı menyono ma hiğmonwotho du Iraq xıd tedbire mqabıl du froso du virus d’Corona, elo amtagılyone Iraqoye athmıl blalyo layimi naqla hreto bu wahdo d’Altahrir bi erişkoyto d’Boğdod, u rfıdlın dmiraşıh kul farsufo dlowe şaryo li wolitho di rişonutho di şultonutho hathto.

Amtagılyonani ba slogane dmazcaqlın ba lohiyotho dıtcınlın, rfıdlın i mraşhonutho d’Nacim Alsuhayl dımşakıl huwe i şultonutho hathto cal dkıtyo qariwo mu rişwazire catiqo Nuri Almaliki.

Menyono d’qoyume Iraqoye bi maqırhonutho dhulın athmıl lu tboco froso, makadlın dkito awyutho kamılto bayn da hadome di sictho şbicoyto folitiqoyto da Şica du Iraq, calu mraşho Alsuhayl, bıthır mdıgrışwo u mraşho dmeqım Muhammad Tawfiq Callawi mi wolitho du şekolo di şultonutho hathto bu şuroyo du yarhano d’Odhır.

Qoyumo mu koalisyon d’Sayirun dkımrayşanle u gabo d’Alsadır, bi maqırhonutho dhule athmıl, maglele dkito 80% awyutho calu mraşho Nacim Alsuhayl. U mırleste “ba şoce dıbqamuthayna i sictho şbicoyto gdımqadmo b’şıkıl ruşmoyo u mraşho Alsuhayl lu rişqutno laşan dmitahwele fsoso dımşakıl işultonutho hathto du Iraq”. U qoyumo du gabo d’Alsadır makadleste i ulsoyutho dmitatimo i sbuthathe meqım mıdkımlo i muhle du nomuso esonoyo.

I sictho şbicoyto da Maşılmone Şica du Iraq kmişaklo m’hadome mu koalisyon d’Sayirun, u koalisyon d’Alfatıh, u gabo d’Alhikma, u koalisyon d’Alnasır, Dawlıt Alqanun, u koalisyon d’Cataa ud’Alfadila.