A’rişone dı Britania, Fransa ud’Kanada, bu buyono mşawtfo dıfrıslın athmıl, tlıblın m’İsroyel dmakılyo u qrobayda calu qlimo d’Ğaza

BRITHO – U buyono mşawtfo da tlotho athrawotho dıfrısla i şultonutho dı Britania, mathkarle du qedomo di şultonutho d’İsroyel dıkmınco dmitacbıri a’mcadrınwotho noşoye asasi la comure mdinoye d’Ğaza sbutho dlıkmitaqıbloyo, ukdayşo u qonuno noşoyo emwothoyo. 

U buyono da tlotho rişone dı Britania, dı Fransa ud’Kanada, mawdacle ste dkıtyo mqabıl dkul şıkıl d’fulhone dkımnasın dmarwıhi a’bote da İsarloye bi Diffa Macırboyto, u mırle “dlo keşlo gıdmahtina tedbire cal Tel Aviv dkıtlın nişo mhadıdo. Aminoyith snıdlan u zedqo dkıtla İsroyel dımdafco an’İsarloye mqabıl di marıhbonutho. Elo i mwatyuthathe lo b’şawyutho kımqadmo. Ahna lıgıdfayşina mfarçone bu zabno dkımdawmo i şultonutho d’Netenyaho ba fulhonani a’barbıroye”. 

M’gabo hreno, u mathlono du rişono d’Amerika dkımcaqıb i sbutho da yasire Adam Boler, mawdacle du tedciro da yasire İsarloye dkıtne b’Ğaza şart yo dmımte l’qyomo. Boler bi maqıblonutho dsımla acme athmıl i şabake d’Fox News mırle “ida d’Hamas kıbco dmitakle u qrobo, klozım dmarfiyo a’yasire. Ktılbina ste m’Hamas dmasılmo a’şlade d’arbıco yasire Amerikoye”. 

Mxasra hreto, u gayso d’İsroyel kımdawım u hçomayde u qaşyo calu yurxo du thumo dkımşare mi mditho d’Bayt Lahiya mi xasra du garbiyo, uhulu gbino d’Moraç mi xasra du taymno b’gawıd du qlimo d’Ğaza. Lfuth u froshezwo d’Alcarabiya, u gayso d’İsroyel kmıstacmıl ba hçomayde a’topat yaqure wa sfinotho du qrobo. 

Adyawma safrayto, mabuce du hulmono mawdaclın dıqtil 53 Fleştoye b’hçome İsarloye dsimi b’zabno d’noqıs m’tarte şoce bu qlimo d’Ğaza.