Armin Laschet mnaqe rişono hatho lu gabo d’CDU d’Almanya

Armin Laschet mnaqe rişono hatho lu Huyodo da Mşihoye Demoqratoye-CDU d’Almanya.

Bu quwolo dsim bu gabo, mıdle Laschet 77.5 ba mo da qole u Markus Söder mıdle 22.5 ba mo da qole.

Bıthır şeth şoce d’droşe, sim athmıl quwolo bu knuşyo dsımle u Huyodo da Mşihoye Demoqratoye d’Almanya. Bu quwolano, mıdle u mraşho Armin Laschet i sagiyoyutho da qole-b’77.5 ba mo da qole, mqabıl d’22.5 ba qole du mraşho trayono Markus Söder dkıtyo me Bayern umu gabo muttafik d’CSU.

A droşe dhawın beyn Laschet u Söder xlıqwolın zuctho b’Almanya cal dkıtwo qento du gabo d’CDU u CSU dmıfloği me hıdode. Elo bi harayto huwle Söder

maqırhonutho u m’akadle, dgrışle ruhe mi mraşhonutho dli rişonutho du gabo.

Bu şıkılano gıdmoyıd Laschet dukthe d’Angela Merkel u kıtle sabro, dminaqe ba guboye dgımisomi bu yarho d’İlül xıd rişwazire du athro. Bıthır ma guboyani’ste, gıdtoyım u dawro di rişathwazire Angela Merkel dhani 16 eşne kısaymo i rişonutho d’Almanya.