Ba alfowat sıme tagliyotho mqabıl d’Netanyahu

Hol 10 alfo bnaynoşo layimi qum du makthbo du rişwazire d’İsroyel Benyamen Netanyahu bi mditho d’Urışlem u tlıbe mene dmıstacfe mi wolithayde mi celtho du virus d’Corona uma thome du fassad.

 Hani 7 şabe cal hıdode, kımdawmi a tagliyothani mqabıl du rişwazire wu polis İsarloyoste kımnase dmakle a mtagliyone dımqarwi la bınyone ruşmoye di şultonutho.

A tagliyotho bı dukotho u mdinotho mşahılfotho d’İsroyel; beynothaye Urışlem, kul dkothe kıqoşın u kull yawme d’Şabtho, kmıkfoxi a mtagliyone la zabuqone leşan dmahwın ilo thnihuthathe li şultonutho du rişwazire Benyamen Netanyahu.

Lfuth i sfaryawmo Haaretz, athmıl u adyawmaste naqla hreto, hol 10 alfo mtagliyone layimi qum du makthbo d’Netanyahu u tlıbe dmıstacfe mi wolithayde cal dılo qadır dmoyıd tedbire mqabıl du virus d’Corona u bebzabno cal dıkmıthım ba hawbe du fassad.

B’İsroyel, tafi u virus d’Corona l’72 alfo bnaynoşo u makıd dıhol 500 farsufe nqili ma haye. A thomani du fassadste cal qariwo gıdmimodi li idho bu bethdino du athro.

Ba tagliyotho dhawın athmıl, mjarıh 5 farsufe u msik 4 hrene bıthır mıd a yaminoye qaşye hjımlın ba kefe cala mtagliyone b’Ashkelon, Sderot u Haifa. Bebzabno u poliste mıstacmele cnufyo leşan dımbarbız a mtagliyone mu wahdo.

A tagliyotho mşayne b’İsroyel, kımdawmi ma 2011 mqabıl di şultonutho mcal fothe du timo celoyo di ciyeşe u di batilutho da şuğlone dmatyo l’20 ba mo. Elo ba şabe haroyani, qaşın ğalabe, bıthır mıd Netanyahu mawdacle, da mtagliyonani semoloyene u anarşistne.