Bassam Said Ishak simle i şultonutho Darımsuq sturyo

WASHINGTON — U rişqutno d’Suriya Ahmad Alşarıc bu mamlo dsımwole lu camo cala gedşe du cnufyo d’Sweda mırwole “mnaqelan u darbo du fhomo laşan u nfoqo du moro li hdoyutho du athro”. Bu fuşoqayde lu mamlo d’Alşarıc, u mathlono du mawtbo d’Suriya demoqratoyto b’Waşington Bassam İshaq bi maqırhonutho dıfrısle bi dafayde du facebook mırle;

“u mamlo d’Alşarıc şuhlofo folitiqoyo ulsoyoyo, ukımmathıl ictiraf di şalyutho lo bu tworo du droco kmıbnoyo, elo bu fhomo ubi awyutho. U rejim dmeqım mi celtho du haylo dmıstacmele udi canadiye dkıtwole mvayacle u tuxlono du camo u mvayacle ste u athro. Adyawma kito gado mşahılfo, ukiban dımmina ebe di hdoyutho lo bu haylo kmisomo, elo bu tuxlono. Wu mede dhawi bi hiğmonutho d’Sweda, kibe dhowe asas l’cayni prensib bu şroyo ubi mdabronutho da krize mşahılfe u mgawne dkito b’Suriya”. 

İshaq mawdacle ste du rişqutno Alşarıc mıdle hergo ulsoyo mu kriz d’Sweda, uba melani mdawamle;

“i hdoyutho dıkmitarkıwo bu darbo du fhomo u asas d’Suriya i qwithoyo, elo i hdoyutho dıkmıçboro cala noşe vyoco u dugloyo”. Ishaq grışleste u zuhoro calu qyomo d’Sweda dhiwo i wolitho di mşaynutho la grube gawoye mzayne da Druz, u hawxa mşayele “qay u mathlano lıkmitabıq bu garbay madınho, bu sforyamo ubul duktho m’Suriya?. Qay a’şutose di mşaynutho udu gayso lıkowın şutose athronoye ftihe b’qamuthıd da Suriye kulle ba gawnaththe a’mşahılfe?”. 

Bu huthomo di maqırhonuthayde, İshaq mırle ste;

“bıthır d’14 ışne dı qrobo, a’Suriye ma came mşahılfe du athro kıtlın sabro dmitarku athro hatho, athro dkımsanıt elaye, lo kdaşlın. Athro dkımdabır a’gawne kulle lo kmankarlın. Athro dıknofıq moro lu neshono djul noşo. Ayko kiban dhozina hawxa athro?. Balki u funoyo towo d’ucdo dmaftina la haye u diyalog mdarbıd du haylo, udbonina u tuxlono mdarbıd du dyoşo”.