Bi sbutho du yamo mıscoyo a hfuxye mqabıl d’Turkiya kozaydi

Bi sbutho di mwatyutho dkito bayn Turkiya u la athrowotho şıbobe du yamo mıscoyo mıqa dkothe ksaydi a hfuxye dımqabıl d’Turkiya, me gabo a 7 athrawotho dkıtne şıbobe du yamo maqrahlın d’Urifi hadırtoyo dmahto tadbire cal Turkiya u me gabo u waziro di baroyutho d’Amerika Mike Pompeo maqrahle dı Turkiya klozım gurşo a hayle dkıtle qariwo li Gozarto d’Qufrus u lu Yawnan.

U waziro di baroyutho d’Amerika Mike Pompeo dkımhadır i socurutheyde dıksoyım li gozarto d’Qufrus tlıble me Turkiya dı gurşo ahaylawotheyda ma dukotho du yamo mıscoyo dhawi celtho li mwatyutho bayn Turkiya u la athrawotho şıbobe. Pompeo mawdacwole meqım dıksoyım socurutho li gozarto d’Qufrus laşan dı dorış i sbuthathe me qariwo dmisım thınihutho bayn da athrawotho dkıtne mışawtıfe bu qatrano dsımla Turkiya bu yamo mıscoyo.

Bu knushyo dsımlın a 7 athrawotho dkıtne şıbobe cam Turkiya bi sbutho du yamo mıscoyo mıtafaqlın du huyodo da athrawotho d’Urifi dmahıt tadbire cal Turkiya en dılo gurşo a hayle dkıtla bu yamo mıscoyo.

Bu knuşyo d’7 athrawotho dkıtlın asirutho camu yamo mıscoyo da thumathe masrene bu yamano xıd Turkiya dkıtyo masırto ebe. Drıshlın i mwatyutho dkito bayn Turkiya u lu athro du Yawnan u li Gozarto d’Qufrus du Yawnan u matın lı netije  dıklozım Turkiya gurşo ahayle dkıtla bu yamano u makılyo u kroxo dcalu nafto. A athrawotho dkıtlın athumathe camu yamo mıscoyo dıkmote la thume d’Turkiya hanine Fransa, Spanya Portekis, Italya,Yawnan Malta wi Gozarto d’Qufrus Rum.

Bu knuşyo dsımlın athmıl drışlın i mwatyuthathe u matın lawyutho du huyodo d’Urifi mahıt tadbire cal Turkiya en dılo gurşo a haylawotheyda mu yamo mıscoyo.

Bi maqırhonutho dsımle u rişqutno d’Fransa Emanuel Macron cal ışme du knuşyo mırle dılo şıkuk matina lawyutho du kroho d’Turkiya kıbco dsaymole bu yamo mıscoyo lo qonunoyo mawxa klozım makılyole, bi sbuthathe mbayanlan siqumo dı dmitahıt tadbire acla mu taraf d’Turkiya, bebzabno trelan tarco ftiho du diyalog en Turkiya dıbco dsaymo diyalog bi sbuthathe.

Bi maqırhonutheyde mırle inaqa dı Turkiya gurşo ahaylawotheyda mu yamo mıscoyo inaqayo kiban dırşina i tahrazto dmamtıyo thınihutho lu qlimo kulle.

Bu zabno d’Turkiya kcayşo qatre cama athrawotho şıbobe u athrawotho hrene folitiqoyith u tahirathe kmahwe bgawe du athro ekonomoyith.

Mathlo lu medano du taşroro dıfrısle u tukoso du quyomo ekonomikoyo u du fulhono mşawtıfo d’Turkiya dmawdacle d’29 bamo ma clayme u claymotho du athro dkıtne laltah me 30 lo kuzın la madraşyotho u lo kfılhi.

Lfuth u taşroro du tukosano d’OECD Turkiya ba sedre haroyeyo bi sbuthathe u di claymutho dlatla mede dı saymo, be bzabno lfuth i mawdconutho dıfriso bhaq da batile du şuğlo u mınyono kcole cıl me 13 bamo.