20/07/2021

Biden maqbele bu Qusro Heworo u malko d’Yurdnon Cabdalla da II.

U rişono d’Amerika Joe Biden mıstaqbele bu Qusro Heworo b’Waşington, u Malko d’Yurdnon Cabdalla II dıksoyım ucdo socurutho lu athro d’Amerika.

Lfuth u tboco froso dı britho, u nişo di socuruthathe dmitaqwiyo i şawtofutho stratejikoyto beyn di mamlaxtho d’Yurdnon udu athro d’Amerika’yo.

U malko d’Yurdnon Cabdalla II bi socurutho dsımle l’Waşington, hawi u rişono Caraboyo qamoyo dıkloqe u rişono Amerikoyo Joe Biden bu Qusro Heworo.

Lfuth u diwan di malkutho d’Yurdnon, u nişo di socuruthathe dmaqwiyo i şawtofutho stratejikoyto beyn da 2 athrawotho, dmıflıh dmitarkıwo i şalyutho bu Madınho Mescoyo, dmitabde u maşıqlo du nfoqo mu kriz di Corona, u dmınqolo i hzayto da Caraboye lu Qusro Heworo bıthır mu fulhono diplomatiqoyo dhawila Yurdnon bu qlimo.

Camgabıdathe, mawdıc d’Biden bi ytawtathe dcamu malko makadle d’Amerika gıdmdawmo dmaqwiyo i methcadronutho cam Yurdnon. İ malılto du Qusro Heworo Jen Bsaki mawdacla di socuruthathe gıdhuyo aftho dmıdrış ğalabe ma casqotho dıkloqe Madınho Mescoyo, u dmi’akıd u dawro rişoyo dıkmıştacyo Yurdnon bu teqwiyo du şlomo udi şalyutho bu qlimo.

Mxasra hreto, mşalo d’Pentagon dlo mathkır ışme, bi maqırhonutho dhule, mawdacle di mdabronutho d’Biden kıbco dmaydo Yurdnon b’dukthe d’Qatar xıd qentrun folhoyo d’Amerika bu Madınho Mescoyo. U mşalo Amerikoyo mathkarle di mdabronutho d’Biden sxırla nuqazyotho folhoye b’Qatar-dilonoyith dkito bıgawaye cambare du zayno yaquro, u nqilila l’Yurdnon.

Magle’ste d’Amerika kıbco d’Yurdnon dmıştacyo dawro sanodo l’Amerika bu maşılqo dbıthır mu groşo du gaysayda me Afağanistan, bu yarho d’Ob dıbqamuthayna. Lfuth u mşalo Amerikoyo, Woşington kubco d’Yurdnon dsaymo baytoyutho l’tahrazto d’droşe dilonoye la hayle Afğanoye.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…