HDP mhanele u yawmo şatonoyo da 9 eşne du qawmo di Gozarto

Bu yawmo şatonoyo da 9 eşne du qawmo di Gozarto dkıtyo 19 bu yarho d’Tamuz, frısle u gabo Demoqratoyo da Came egartho u mhanele a came frişe di Gozarto d’Bethnahrin.

Me gabo hreno mawdıc, d’Katalonia kımtaybo ruha dmawdıyo bi Mdabronutho yothoyto du garbyo udu madınho d’Suriya.

U gabo Demoqratoyo da Came-HDP, mhanele a came du garbyo udu madınho d’Suriya bu yawmo şatonoyo da 9, du qawmo d’19 Tamuz. Bi egarthathe HDP mırle; U qawmano mahwele lkull noşo b’britho, dkito mkono l’darbo 3’yo. U qawmo di Gozarto, nesyuno ulsoyo makthabzabnoyo’yo dıklozım u şuşotano dmihafıd acle bkull darbo.

HDP mırla; U qawmano, xlıqle şuhlofo makthabzabnoyo du Madınho Mescoyo u kımathır calu qlimo kule. U rejim du Bacth mu zabno di mşatsonuthayde, dışle i şawyutho, i hirutho wa talabe demoqratoye da camu du athro kulle u mafıtile bu cnufyo uba qtolcame. U rejim ğlıbwo bu qawmano dsımwo ba 2012 u mşahlıf bu şıkılano u darbo makthabzabno.

HDP kımmo; U qawmo di Gozarto xlıqle haye hathe u mşawtıfe beyn da came-lo belhude da Kurdoye, elo da Suryoye Othuroye, Armınoye, Caraboye, Turmanoye, uğer u calathe kımmina dhano qawmo da came’yo, da neşe, di claymutho da haymonwotho frişe’yo. Me gabo hreno mawdıc d’Katalonia kımtaybo ruha dmawdıyo bi Mdabronutho yothoyto du garbyo udu Madınho d’Suriya.

A gabe dkıtne bi şultonutho wa gabe saqıbloye du qlimo yothoyo d’Katalonia, mqadamlın athmıl, bu yawmo şatonoyo du qawmo d’19 Tamuz rmoyto lu parlamento, leşan dmisım quwolo u dmitıctarıf bi Mdabronutho yothoyto xıd remzo di awyutho udu snodo d’Katalonia. Bıthır mıd kulle kısundi i rmoytathe-kımahwe d’Katalonia gıdmawdıyo bi Mdabronutho yothoyto.