Bıthır me Fransa Amerikaste mşayacla sfitho lu Yamo Mescoyo

Bi sbutho du qetro du Yamo Mescoyo dnafıq cam Turkiya, bıthır me Fransa ucdo Amerikaste mşadarla hıdo ma sfinothayda du qrobo lu yamo Mescoyo.

 Me gabo hreno i wazırto du sutoro d’Fransa bu mamlo dsımla la folhe mawdacla, d’Fransa gıdmşadro hıdo ma sfinothayda dkıtyo bu yamo Mescoyo la thume du yamo d’Libya.

 Amerika mawdacla dımşadarla sfitho folhoyto lu yamo Mescoyo leşan dhowe nihutho bu qlimo. I sfitathe dışma USNS Yuma athmıl fayito ma thume d’Turkiya lafa thume di Gozarto d’Qufrus u du Yawnan.

Lfuth i mawdconutho dıfriso ba mabuce du tboco froso kmitawdıc, di sfitathe mlithoyo zayne u dmatyo lu yamo Mescoyo bi duktho dkito u qetro dbeyn Turkiya wan athrawotho du Huyodo d’Urifi.

Bi maqırhonutho dsımla i wazırto du sutoro d’Fransa Florence Parli mırla; Bıthır mi sfitho dımşadrolan meqım lu Yamo Mescoyo beyn da thume d’Turkiya u du Yawnan, ba yawmotho dımqamutheyna gıdmşadrina sfitho hreto du qrobo lu yamo d’Libya, leşan dımcaqbina u fusqono d’mıdla Emwotho Mhaydotho dımnıcla u zebono da zayne lu athro.