Bu quwolo dsim bu parlamento du Iraq maqbıl dmisım şuhlofo bu qonuno hatho du bethdino federaloyo

Bu quwolo dsim bu parlamento du Iraq, i sagiyutho da qoyume maqbelın dmisım şuhlofo bu qonuno hatho du bethdino federaloyo, dıkmıtlabwo ebe dmibayın yadıcthone di tawditho Maşılmonitho bıgawe di sictho da dayone du bethdino.

Bebzabno, a qoyume Iraqoye mayadlın dhowe mathlone da came mşahılfe du Iraq bıgawe du qonunano du bethdino celoyo.

A gabe Maşılmone tuhmonoye du Iraq bıthır mıd lo makşarlın dmafiti u qonuno hatho du bethdino celoyo du Iraq, athmıl i sagiyutho da qoyume bu quwolo dsim maqbelın dmişahlıf u qonuno hatho du bethdino-dıkmidoşi ebe a came qalilotho du Iraq. Wu fusqonano fayıt la haye bi awyutho d’204 ma 329 qoyume dkito bu parlamento.

Elo a qoyume du camaydan u Kaldoyo-Suryoyo-Othuroyo, da Turkumanoye, da Ezidoye, uda Sabiaa Mandoye u acmaye’ste a qoyume du gabo Demoqratoyo d’Kurdistan cal dkıtwolın klayto mqabıl du qonunano, athmıl lo mıştawtaflın li ytawtathe du parlamento.

Camgabe du teqbilo du şuhlofo du qonuno du bethdino, u parlamento du Iraq maqbele’ste dhowelın a came qalilotho mathlone bıgawe du qonunano. Lfuth i maqırhonutho dhulın a qoyume du camaydan, u quwolo dcali ruşmoyutho du qonuno hatho du bethdino dımşahlıf athmıl, gıdmıtre hula guboye gawonoye dıkmıntır dmisomi 10 bu yarho d’Teşrın u qadmoyo di şatathe.

Bu hfuxyo dmahwelın a qoyume du camaydan, mawdaclın di klayto da mathlone da came qalilotho dlo mıştawtaflın la 3 ytawyotho haroye, mamtela netiçe msimonitho, ulo trela dmibayın yadıcthone di tawditho Maşılmonoyto xıd hadome bıgawe di sictho da dayone du bethdino.

Bebzabno, a qoyume du camaydan athmıl bu knuşyo dsımlın lu tbocofroso bıthır mi ytawto du parlamento, mqadamlın a tawdiyothathe la gabe, la qoyume, la tukose mdinoye, la tahbaryotho u federasyone dmahwelın awyutho acmaye u cama qalilotho du Iraq.