Çelik mqadamle rmoyto lu parlamento cala hbose u rdufye dkowe cali cito protestaneyto

U qoyumo du cameydan bu parlemento d’Turkiya Tuma Çelik mqadamle rmoyto lu waziro di gawoyutho d’Turkiya bi sbutho da hbose uda rdufye dkowe cali cito protestanoyto.

 Çelik bi rmoytathe kımşayıl şuwole mu waziro Suleyman Soylu, dkobıc a funoye bı kthawto lfuth u qonuno du parlamento d’Turkiya.

 U qoyumo bi rmoyto bi qamayto kobe darbo lu taşroro dıfrısle u hudro da citawotho protestanoye di şato da 2019, wa casqwotho dıkhozın a mşale u rişone da citawotho protestanoye. Bu zabno dı fayıt Turkiya maklela 35 mşale di tawditho Protestanoyto inaqa ha dhoşuw kul mşalo wi iqartheyde kowın hedor 100 farsufe.

I celtho du tekliyo da farsufani latyo idico qay, elo kmitahıt l’futh N82 wu qonunano latyo makılyono da viyaz da cawode aw mşale dkibın cıbri l’Turkiya u maşın fulhono.

Bu şıklano Turkiya kobo sırto da citawotho protestanoye latne ruşmoye b’Turkiya, mawxaste latyo mede kyono dıksaymo i şıltonutho d’Turkiya mqabıl da mşale da citawotho da mşihoye. Mawxa u qoyumo bi rmoyteyde kımşayıl şuwole dkobıc funoyo aclaye mu waziro di gawoyutho Suleyman Soylu.

I wiza dıkmo farsufe makılyo lfuth u qonuno d’82, ma noşani dı makılyo i vizathe kımo mneye kito bethdino bhaq dıthe. Hal a fulhone da citawotho protestanoye mnicene b’Turkiya, en kito dino du bethdino dıkmonıc a fulhone da citawothani. Ba şuwole hrene dkımşayıl u qoyumo Tuma Çelik komır qay hawxa kmisım hboso cala mşale di cito protestanoyto dkıtyo b’Turkiya ruşmoyto.