Darimsuq mbayanla u qatolo di Evrin Xalaf rişono di gudo da n’86 du gayso d’Suriya

DARIMSUQ – I wazirutho du sutoro di şultonutho zabnoyto d’Suriya mbayanla athmıl Ahmad İ(h)san Fayyad Alhayıs dıkmidıc bu ışmo d’Hatem Abu Şaqra, rişono hatho di gudo folhoyto da n’86 du gayso d’Suriya. I dawsathe xlıqla şişaltho d’hfuxye u cajaze rabtho mhın mşale emwothoye, u gelyunore baynothaye i rişonutho di notarrozutho gawonoyto di sictho emwothoyto di hirutho tawdithoyto Nadin Maenza. 

Hatem Abu Şaqra awkith Ahmad Alhayıs ha ma rişone du grub da çatawiye d’A(h)rar Alşarqiya we. Ubebzabno huwweyo u mşalo dcalu gunho du swikast di notrathrozo gawonoyto du gabo du Dactid d’Suriya Havrin Xalaf wu qaloco di radaytayda Farhad Ramadan dsımwo bu yarho dı Tışrın u Qadmoyo bi şato da 2019.  

Camgabıdathe, i wazirutho di Xazine d’Amerika mahıtwola tedbire cal Ahmad Alhayıs bi şato da 2021, u acme ste u grub d’Ahrar Alşarqiya. I wazirutho di Xazine bu buyono dıfrıswola mawdacwola d’Alhayıs kmıthım dsımle menyono d’gunhe u dyoşe bhaq da zedqe noşoye, baynothaye i mşalutho dsımwole calu hbuşyo da çatawiye b’Hlob bi şato da 2018, udsımwo b’gawe icdame mkanşe bhaq d’mowat d’msikoye. 

I wazirutho Amerikoyto thımwola ste Alhayıs dsımwole tagorutho da neşe uda nacime Yezidoye, udıftıhwole u darbo b’qamuthıd da marıhbone dı Dacış dmıştawtıfi li gudo d’Ahrar Alşarqiya dıkmaydowa fıdye awkith zuze mqabıl du terfiyo da msikoye.