DAŞTO d’NINWE: bi fnitho d’Nahla sim u qudoşo di cito du sohdo Mor Gorgis di cito d’Madinho d’Othuroye

NAHLA, Ciraq – İ qadişutho du fatıryarxo di cito d’Madınho d’Othuroye Mor Awa Roel, sımle yawme d’Şabtho dşaficina socurutho li qritho du camaydan d’Hizane dıknıflo bi fnitho d’Nahla di daşto d’Ninwe bu garbiyo du Ciraq. İ qadişuthayde dkıtwo acme taşdarto ma hsayo u kohne di marcitho fatıryarxoyto, mıstqabıl m’zawho camonoyo rabo ma şamoşe, calyme u calaymotho du camaydan dılwışlın lbuşe dy folklor marduthoyo Othuroyo. Bıthır mathe, Mor Awa cama qole di gudo uba hılhole da neşe, qısle u şorito du futoho di cito du sohdo Mor Gorgis bi qritho d’Hizane, u salıq b’zawho ruhonoyo lu madhıbho mqadşo di cito.

U kohno di marcitho dumrayşanle u qurobo alohoyo, i qadişuthayde ste mşıhle bu mirın mqadşo u madhıbho wa şurone di cito. Bıthır mu mamlo dsımle u kohno di marcitho, fatıryarxo Mor Awa Roel bi koruzuthayde ste mhanele a’comure di qritho d’Hizane bu futoho di cito du sohdo Mor Gorgis, u mqadamle ste tawdiyotho lkul man dhawi sanodo bu bnoyo du bayto hatho d’Aloho. Mor Awa Roel mlabable ste a’mhaymne di marcitho dfayşi masre camu cafro da n’abohothaththe, udnıfqi moro li hiyoyuthaththe, lu leşonaththe ula cyodaththe.

Camgabıdathe Mor Awa Roel sımle u futoho du salon da fulhone kenşoye u marduthoye di cito dmahıt ışme bışmıd du tlithoytube fatıryarxo Mor Tuma Darmo. Ba mamle dsimi ma hsayo u kohne u mşale cılmoye di cito, mqalsi a2fulhone dıksamlın i qadişutho du fatıryarxo Mor Awa Roel bu taro di mşablonutho da marciyotho di cito d’Madınho d’Othuroye bu Ciraq, udilonoyith bi daşto d’Ninwe.