DEM parti u Abdullah Öcalan kıtlen ntarto u komisyon du şlomo dilonoyo dgımişakıl dxolıq arcutho lu şlomo uli demoqratoyutho

ANKARA/IMRALI — Athmıl sımwola i taşdarto d’İmralı socurutho lu rişono Kurdoyo Abdullah Öcalan dkıtyo bu hbuşyo di gzırto d’İmralı. Bıthır mu dcorayda, frısla i taşdarto adyawma egartho u mahkela cali netiçe di ytawto uda droşe dhawın cam Öcalan. Bi egartho mawdıc, di ytawtathe dımdawamla athmıl 3.5 şoce falge cam Öcalan, hawi droşo yarixo u mşahlıf renye u hzayotho.

İ taşdarto mahkela cala ytawyotho dhawın camu rişqutno Turkoyo, camu waziro di kinutho ucama rişone da gabe folitiqoye hrene du athro u kle calu zawho dsımwo 11 bu yarhano calu tehriwo d’sahmo mu zayno du gerilla di PKK. Öcalan’ste mawdacle i hzaytayde, du zawhano dsim, du sebyono udu fusqono kamilo dmahwe leşan u şlomo ğalabe towo, şroro u yaqiro’we.

Bebzabno Öcalan m’akadle dkıtle ntarto ma fulhone du komisyon dilonoyo dgımişakıl leşan dxolıq arcutho lu şlomo uli demoqratoyutho ubı darbo d’strateji rwiho. U rişono Kurdoyo mqadamle’ste a şlomayde lu camo ulu kenşo kule. İ egarthathe d’DEM friso, bıthır mi ytawto dhawyo bu parlamento d’Turkiya leşan u şekolo d’komisyon dilonoyo bnişo dımcaqıb u maşıqlano du şlomo.

U rişono du parlamento athmıl m’akadle dmid fusqono dmişakıl komisyon me 51 hadome u tlıble ma gabe kulle dımqadmi lohitho d’mraşhe dgımaydi duktho bu komisyonano dıklozım 21 ma hadomayde dhowın mi AKP, 10 hadome mi CHP, 4 me DEM, 4 mi MHP, 3 mu gabo d’Yeni Yol, wa gabe nacime hrene-HUD PAR, TİP, EMEP, DSP u DP kull ha ha hadomo dıklozım dmiqadmi hol 31 bu yarhano.