Image: DEM website
17/02/2025

DEM Parti u Mascud Barzani hawilen itawto b’Arbca’ilo leşan u maşqılo du şlomo b’Turkiya

U rişono du gabo Demoqratoyo d’Kurdistan di KDP Mascud Barzani, mıstaqbele bi mditho d’Arbca'ilo taşdarto mu gabo di şawyutho udi demoqratoyutho da came dı DEM parti dıksoyım ucdo socurutho lu qlimo d’Kurdistan du Ciraq bıthır mi lqoyto dhawiwole camu rişono di PKK Cabdalla Öçalan bu hbuşyade dkıtyo bi gozarto d’Emrali. Bi ytawtathe, Barzani mawdacle dkıtyo hadiro kulonoyith dımcadır udsonıd u maşqılo du şlomo b’Turkiya udnofıq b’kaşirutho.

17/02/2025

ARBCA’ILO (ARBIL)  —U rişono du gabo di KDP Mascud Barzani, mıstaqbele athmıl bu qentrun d’Salahıddin bi mditho d’Arbca’ilo, i taşdarto dı DEM parti d’Emrali bi rişonutho d’Perwin Bokdan u Sare Suraya Önder. 

Bu şuroyo di ytawtathe, i taşdarto d’Emrali mahwela i hzayto dkıtla cali aykanoyutho folitiqoyto ucalu maşıqlo du şlomo b’Turkiya. İ taşdarto nqila ste l’Barzani i netiçe di lqoyto dhawiwola camu rişono du gabo di PKK Cabdalla Öçalan wi egartho dımşadrole l’Barzani.

Bi ytawtathe ste, Barzani makadle i ulsoyutho du maşıqlo du şlomo cal dkıtyo u darbo ihidoyo u triso laşan dmımte lu şroyo, u mawdacle dıklozım a’gabe kulle dımhaydi a’fulhonaththe bnişo dmakşır u maşıqlo du şlomo. Barzani mawdacle ste dkıtyo hadiro kulonoyith dımcadır udsonıd u maşqılo du şlomo b’Turkiya udnofıq b’kaşirutho.

Adyawma ste, u rişono du qlimo d’Kurdistan du Ciraq Neçirvan Barzani mıstaqbele i taşdarto d’Emrali bu qentrunayde b’Arbca’ilo.

Athmıl, Neçirvan Barzani bi maqırhonutho dhule lu tboco froso bi mditho d’Munix, mawdacle di taşdarto d’Emrali athyo li mditho d’Arbca’ilo matcanto cami egartho d’Öçalan, u mathkarle ste dıkmıtyaqın dhuyo egartho d’şlomo ud’şalyutho b’Turkiya.