Donald Trump kosonıd u renyo da folhe du Sin dsaymi du duyoqo di mşaynutho b’Ukraina

WASHINGTON — Donald Trump kısoyım hboso cal Rusya u Ukraina dmotın l’awyutho cal qyomo du şlomo elo Mosko u Kiev, kımahwe heş ğalabe rahuqe’ne b’sebwotho dkıtte asirutho bu kontroll dan arcotho. Calathe’ste Amerika, Ukraina wa rişone Urifoye kımnasın dımşakli şıkıl d’qlimo mşayno, dkibe dmisım u duyoqayde me hayle şarye di mşaynutho ubi sbuthathe, Rusya mqadamwola awıl naqla renyo, du Sin dsoyım i wolithathe.

Calathe’ste u rişono d’Amerika Trump bu knuşyo dhawiwole ba yawmotho dşafıcina cama Urifoye bu Qusro Heworo mkararwole u renyano d’Rusya. Lfuth Trump a folhani du Sin kibın dhowın mcadrone bu duyoqo di mşaynutho d’xtuto neutral-şaryo, dkıtyo 1.300 kilometre yarixo bu gbino du qrobo beyn Rusya u Ukraina. U Qusro Heworo, bıthır rfıdwole d’Trump mamtele hawxa renyo.

Elo mawdıc’ste, da rişone Urifoye wu rişqutno d’Ukraina Zelenskij, lo maqbewolın u renyano cal du Sin ha man athrawotho dıksonıd Rusya’yo. Me gabo hreno, Almanya u Fransa mıttafaqe dmaqşın u hbosathe cal şırak d’athrawotho frişe dıkmaşın tagorutho cama Rusoye ubebzabno, dımşadri sisteme du sutoro da thume oyaroye d’Ukraina.

Camathe’ste a wazire du sutoro dan athrawotho Urifoye layimiwo athmıl b’Danmark leşan dorşi aydarbo gıdsundi Ukraina tawtır-en dothe dhowe şalyuthzayno aw dmımte l’qyomo du şlomo. Bu knuşyano mawdıc, dhol 80 alfo folhe Ukrainoye qayıthlın adşato droşe folhoye ban athrawotho d’Ufiri u mbayın tahrazto, dmitazıd u mınyonano da folhe Ukrainoye.