Ba mo alfayo neşe, kfixi la zabuqone b’Spania, Almanya, Fransa, Turkiya, Suriya, Meksiko u tlıbbe a zedqathe a kamile u dmitakle u cnufyo dıkmisım aclaye

B’Barcelona d’Spania, layım athmıl ba mo alfayo dıbnaynoşo u mathkarlın u yawmo Tibeloyo da Neşe Falıhyotho d’Britho. İ taglithathe simo, bu zabno da qoyume kıdorşi u qonuno du cnufyo ğensoyo b’Spania. Ba tagliyotho dsimi b’ mdinotho frişe d’Spania, a claymotho yolıfyothoste tcınlın lohyotho dkıtwo kthiwo aclaye; İ mıcne du feminizm ağuno’yo, ahna kıtlan sebyono u kubcina hirutho.

Bu athro d’Meksiko’ste, ban alfayo d’neşe layimi athmıl li arışkoyto bi ithutho rabtho da powelıs du athro. Bi taglithathe’ste a neşe mawdace u hfukhyathe mqabıl da rdufye dkowın aclaye belhude cal dkıtne neşe bkull haqlo da haye-ba şuğlone, ba madırşotho uğer. 

Bğer tagliyotho dsimi b’Amerika u athrawotho frişe d’Urifi’ste xıd İtalya, Yawnan, Fransa, Swisra grışlın a mtagliyone u zuhoro calu cnufyo u cala rdufye ğensoye dkowe aclaye. B’Turkiya walaw i şultonutho mnıcla a tagliyotho da neşe, elo bi mdito d’Stanbul u ğer dukotho layimi athmıl a neşe leşan dtulbi a zedqathe u dhowe şawyutho beyn da ğense.

A şutose da neşe Kurdoye b’Suriya, mtayablın tagliyotho u sim mamle calu mrodo dkobo i athto. B’mdinotho d’athrawotho frişe d’Urifi’ste mathkır 8 Odor ba halxe uba hfitwotho dsimi. Bu dumyano, şafıc u yawmano d’8 Odor bu mrodo ubi klayto dmahwelın a neşe mqabıl di lo kinutho, di frişutho udu cnufyo dkowın aclaye b’britho u tlıbe zedqe şawye.