Emwotho Mhaydotho, Amerika u Fransa krıhlın u hçomo marıhbono dsim cali cito d’Mor Alyas bı Darımsuq

DARIMSUQ – U mathlono dilonoyo d’Ewmotho Mhaydotho b’Suriya Ger Pederssen krıhle u hçomo marıhbono dsim cali cito d’Mor Alyas bı Darımsuq, u mawdacle dkıtyo gunho cjiqo. Pederssen bu buyono dıfrısle sımle qroyto li şultonutho d’Suriya dmatcanla Dacış i mşalutho du hçomano, dsaymo buqore rwihe udmaydo a’tedbire dıklızmi laşan du sutoro da mdinoye. Pederssen tlıble ste ma gabe u tarafe kulle d’Suriya dımhaydi ruhaye mqabıl di marıhbonutho, di tuhmonoyutho, di fıtne, udu hçomo dıkmoyıd nişo ele ayna camo dhowe ma came d’Suriya.

Mxasra hreto, i wazirutho di baroyutho dı Fransa b’qaşyutho krıhla u hçomo marıhbono cjiqo dsim cali cito d’Mor Alyas bı Darımsuq, u makadla ste dkıtyo b’fusqono kamilo dhowe maşıqlo folitiqoyo hatho dkobe aftho la Suriye kulle ma came u tawdiyotho mşahılfe dcayşi b’şlomo ubı mşaynutho b’gawıd d’athro hiro, mgawno, mşawşıto u şalyo. 

M’gabo hreno, u mathlono dilonoyo d’Amerika b’Suriya Tomas Barak krıhle u hçomo cjiqano u mırle “hawxa hçome marıhbone latlın duktho b’gawıd du kenşo du tolerans du şbuqyo, uda gawne mşahılfe dkımşakli Suriya i hathto”. Barak bi maqırhonutho dıfrısle bi dafo d’X, mawdacle du athrayde gdımdawım dsonıd i şultonutho d’Suriya bu ağuno dkobo mqabıl dkul man dkımnase d’zorıc u bulbolo wi zuctho b’Suriya ubi fnitho kula. 

On behalf of @POTUS and the American people, we would like to express our condolences to the victims, families, and individuals impacted by the terrorist attack today at Mar Elias church in al-Duwaileh.

These terrible acts of cowardice have no place in the new tapestry of…

— Ambassador Tom Barrack (@USAMBTurkiye) June 22, 2025