27/01/2021

U gabo di HDP mawdacle hadiroyo dyotuw cama gabe d’Turkiya

İ rişonitho du gabo demoqratoyo da came di HDP Pervin Buldan, mawdacla di şultonutho d’Erdoğan kfılho laşan dmıfloğo i saqıbloyutho mıhdode, ukmazico abnaymothoye laşan dmıfloği ma gabe saqıbloye, elo cılmathe Buldan mawdacla du koalisyon di şultonutho d’APK lıgıdmakışıro ba guboye gawonoye dıbqamuthayna.

 Bebzabno, Buldan mawdacla du gabo di HDP hadiroyo dyotu cama gabe folitiqoye kulle dı Turkiya.

 İ rişonitho du gabo demoqratoyo da came di HDP Pervin Buldan, bi maqırhonutho dhula lu tboco froso, mawdacla du koalisyon di şultonutho dıkmişakıl ma tre gabe d’AKP u MHP, mın dsoyım laybe dnofıq b’zoxutho ba guboye du parlamento dıbqamuthayna, u hatheste cal dlaybe noşo bıbritho dmonıc u sebyono du camo.

Buldan bu mamlayda, mawdacla du koalisyon d’Erdoğan kımnase dmazıc u camo dlımıştawtıf li saqıbloyutho, u bebzabno kımnaseste dfolığ a’gabe saqıbloye mıhdode, elo lfuth Buldan afulhonani kulle dıksamlın u koalisyon gıdızın lu xalyo.

Buldan mırlaste “u koalisyon di şultonutho d’Erdoğan kobıcste dmazıc u gabo di HDP u dmakle u tathirayde, elo u gabo lıgıdmaşlım ruhe la hbosathe. İ şato da 2020 casqo wa ğalabe, mxasra bu mrodo dmahwewo mqabıl du faşist u mxasra hreto u kewo du virus d’Corona. Lfuth i tahrazto hathto du ağunaydan, gıdhowina camu camaydan ba zabuqone, ba wahde ubu parlamento. Hani dkıtlın hulmo dımmaşın siyase dlo mi HDP kımmono elaye: a’noşe kıtlın u hulmo dcayşi b’gawıd dathro dlaybe hawxa şultonutho. Ino bı msaybıronutho knıtrono a’sanduqe da guboye. Ino knıtrono aguboye msarhıbe dgıdmisomi. U sanduqo da guboye u darbo du xalasyo mu koalisyon di şultonutho d’AKP ud’MHP”.

Camgabıdathe, i rişonitho zawgoyto di HDP mawdacla du gabayda hadiroyo dsoyım diyalog cama gabe kulle dkıtne hfite b’Turkiya. Cali qroyto dsımla Buldan, balhude anarbıco gabe di saqıbloyutho hulın funoyo udkıtne: u gabo di GHP, u gabo d’Sacadet, u gabo du Dactid wu gabo dı Dewa, elo a’gabe d’AKP, MHP wu gabo d’İYİ rfıdlın dhowelın droşo cama gabe saqıbloye.