ESU hule maqıblonutho cali sbutho d’Olof Palme

Bıthır mıd u bethdino du Swed fsıqwole du qatolo d’Olof Palme farsufo dı mayıthwo me zabno mşarelın a droşe hedor a farsufe dıthimi bu qatlano mın gıdhowe mane.  Bi sbuthathe sim maqıblonutho camu mşalo d’ESU du Swed dmahkele ba 80 yat sımwo teştıcınyo calu gabo du cameydan ADO, bu qatlo d’Olof Palmeste hawi teştcınyo.

Bu zabno du qatlo d’Olof Palme a pwelıs du Swed thımwolın a gabo di PKK bi marıhbonutho, u bu qatlo d’Olof Palme, bu thomano msıkwolın kımo farsufe dkıtweyne qariwe li PKK elo bıthır me zabno marfınwo.

Bıthır me 34 ışne du qatlo adşato u mqimdayono mawdacle dımthabatlın u qatolo elo mıd mayıth me zabno laybın saymi mede.

Bıthır ma şutose wa farsufe du camo Kurdoyo mşarelın dıtılbi du Swed tolıb şubqono cala thome dsımle aclaye.

Bhaq di sbuthathe u gelyunoro d’Evrensel sımle maqıblonutho camu mşalo du huyodo Suroyo d’Urifi ESU Yahkub Nuhomo u mıdle ihzayteyde cali sbuthathe.

Nuhomo bi mawdconutho dhule mırle me zabno lı zabno kmisim hawxa teştıcınyo metul ba tmoniyat sim teştıcınyo dıkdome lu medano calu gabo du cameydan di mtakasto Othuroyto demoqratoyto ADO bu qatlo dıha farsufo ma abne du cameydan, be bzabno bu athro d’Almanya sımwo teştıcınyo mqabıl du ağuneydan elo lı makşarlın ebe.

Bi sbuthathe u  Swed  ulsoyoyo dıtolıb şubqono mqabıl du mede dsim mqabıl da Kurdoye u du ağunathe di hirutho.

ESU komır u Swed ulsoyoyo dı tolıb şubqono u dımaqım u thomo di marıhbonutho dı maqwewole bu zabno du qatlo d’Olof Palme mqabıl di PKK.

Bi sbuthathe farsufe frişe dkıtne qariwe li PKK mawdaclın du Swed klozım tolıb şubqono mane, hıne lıkıbci tazminat aw zuze mede elo kıbci du Swed maqım u  thomo di marıhbonutho dkito cali PKK.