ESU kımdawım heş dımtayıb hfitwotho laşan isbutho du Sayfo

U Huyodo Suroyo d’Urifi ESU mawdacle i tahrazto da hfitwothayde, leşan dmaşımci isbutho du Sayfo dsim ban 1915 calu cameydan mi mamlaxtho cuthmanoyto wa mcawnoneydan a caşıryotho da Kurdoye.

 Me gabo hreno u şutoso da clayme Suryoyeste kımdawım ba qrayothayde li claymutho du cameydan, dmıştawtıfo la hfitwotho dıkmisomi bi sbutho du Sayfo.

 ESU mawdacle d’adşato mtayable a hfitwothayde lfuth amkone du camo udu maşıqlo dkito ucdo, dlaybe u camo lotım lıhdode u soyım hfitwotho camonoye mi celtho du virus di Corona. Ahfitwotho dımtayablın bu zabnano hanine: I hfitutho qamayto mtaybo calu darbo du internet, dkıtyo kampanya da imdat dkibe kul noşo mu bayto dmıştawtafla inaqla dcobır li dafo du nawlo d’ESU.

 Me tamo kibe dmode i kampanya du Sayfo dgımitasılmo bıthır lu Huyodo d’Urifi. I hfithutho hreto gıdsaymila ramhıl yawme d’Huşabo 14 bu yarhano bi şoctho ba 11 du lalyo, dkıtyo meqım mu duxrono şatonoyo du Sayfo. I hfituthathe dıgduyo haytho bi dafo du nawlo d’ESU, gıdmıfroso hayo b’Suroyo TV’ste.

 ESU kısoyım qrayto du duxrono şatonoyo du Sayfo dkıtyo 15 bu yarhano d’Hziron du cameydan dmaqıth şamco qum du tarco du bayteyde aw du şuğlayde leşan u Sayfo. Sbutho hreto d’ESU mawdacwole, dkıtle talab ma şutose u citotho du cameydan dımcalqi luhe dıkrumzi calu Sayfo cala şurone.

 Me gabo hreno aclayme Suryoye sımlın qrayto lu cameydan, dkul ha tocın luho dkito kıthiwo acla i sbutho du Sayfo u dımsawır sırto, u dımşadarla lu mail du şutoso di claymutho dkıtyo suryoye dot yahoo nuqto com. Bi sbuthathe u mede dkıtyo ulsoyo, u cameydan mıqa dmaşmıc qole calu Sayfo, haqqa kımutyo isbutho da zedqayde la platforme celoye da hayle rabe dıbritho.