ESU sımle qroyto lu Parlamento d’Urifi dımhaliq dawsat şarire leşan ı amniye da mşihoye d’Suriya

BRUKSEL — Bı qroyto msarhabto, u Huyodo Suroyo d’Urifi ESU mşadarle adyawma egartho ruşmoyto lu parlamento d’Urifi cala hawbe dıkmaşın a hayle d’Hayıt Tahrir al Şam uğer ğrobe hrene msalhe b’Suriya. Bu şuroyo di egarthathe ESU mawdacle u ğamayde u mşalatle bahro calu cnufyo barbroyo dıkmdawım dqoşe cala came etnikoye d’Suriya wa qatle wa rdufye sistematik dıkmaşın a ğrobani cala qalilotho du garbay macırbo du athro-awkith a Mşihoye, a Callawiye wa Druz.

Bi egarthathe ESU mahkele calu mınyono da Callawiye dqtili ba hçome dsimi aclaye, a gzome dkowın cala Mşihoye u acme’ste frişle ESU duktho calu hçomo barbroyo dsımwo bu yarho dşafıcina cala Mşihoye di cito d’Mor Elyas u dnafılwo 25 Sohde. Cama qatlani’ste, kmıçbori a Druz li golutho, la qatle uli frişutho wa yaqrotho bi zorriye kmitawfiqi ma botathe. Camani kulle’ste ESU mqadamle mathle d’farsufe mu camaydan dmatilın egrotho d’gzomo di jizya u dmıjbori dımşahlıfi i tawdithathe.

ESU kımawdıc’ste da dyoşani kulle, larwal da prensibe uda timoyotho du Huyodo d’Urifi uda qonune Emwothoye’ne wu ruğzano mqabıl da qalilotho tawdithoye dişutho di hirutho di tawditho u hawbe mqabıl di noşutho’ne. Calathe ESU sımle qroyto lu parlamento d’Urifi ula şutosayde kulle dmaydi tedbire ubeyn dani tlıble; 

• dhowe mawdyonutho ruşmoyto u dmıkrıh HTŞ wa ğrobe tuhmonoye kulle dıkmaşın qşoco etnikoyo b’Suriya.
• dmişadır taşdarto şritho mu parlamento leşan dımtahqıbo a hçome sistematik dıkmisomi.
• dmitakle u snodo baroyo ulo baroyo la haye d’HTŞ ula ğrobe dkıtne acmaye.
• dmıftıh dacwat bu bethdino Emwothoyo da hawbe ubu bethdino da zedqe noşoye d’Urifi mqabıl da hayobe u dmitaltım ithbate cala hawbe dsimi.
• dmisım buhono cali asirutho aw methcadronutho dkito beyn di şultonutho d’Darımsuq uda hayle d’HTŞ ubi netiçe du buhonano’ste dmitahıt tedbire aclaye.
• dmitarkıw mekanizma du sutoro udu tehqobo leşan i mşaynutho da came kulle dkıtne b’qento b’Suriya. 

Bu huthomo’ste ESU sımle qroyto lu Huyodo d’Urifi dnofıq moro la timoyotho, la zedqe, li hirutho di haymonutho ulu sutoro di mardutho udi sagiyoyutho da tawdiyotho dkito b’Suriya ubi sbuthathe’ste, dlo foyış Urifi b’şetqo mqabıl da hawbani elo dımtabıq a prensibe mşawtıfe di noşutho.